ठाणे जिंकण्यासाठी गणेश नाईक, बारामती जिंकण्यासाठी मुरलीधर मोहोळ, भाजपकडून निवडणूक प्रभारींची घोषणा

स्थानिक स्वराज्य संस्थांच्या निवडणुकांसाठी भाजपकडून निवडणूक प्रमुख आणि निवडणूक प्रभारींची नियुक्ती करण्यात आली. राज्यातील प्रत्येक जिल्ह्यासाठी जबाबदार वाटप करण्यात आले आहे. ठाणे जिल्ह्याच्या निवडणूक प्रभारीपदी गणेश नाईकांची नियुक्ती करण्यात आली आहे तर बारामतीच्या स्थानिक स्वराज्य संस्थांच्या निवडणुकीची जबाबदारी केंद्रीय मंत्री मुरलीधर मोहोळ यांच्याकडे सोपविण्यात आली आहे. दुसरीकडे मुंबई महापालिका निवडणूक प्रभारीपदी आशिष शेलार यांच्याकडे सलग दुसऱ्यांदा जबाबदारी देण्यात आली आहे.

advertisement

माननीय प्रदेशाध्यक्ष रविंद्रजी चव्हाण यांनी स्थानिक स्वराज संस्था जिल्हा निवडणुक प्रमुख व जिल्हा निवडणुक प्रभारी यांच्या नियुक्तिची घोषणा केली आहे.@RaviDadaChavan #BJP #Maharashtra pic.twitter.com/vpPv6F5izI

निवडणूक कार्यक्रम जाहीर, २ डिसेंबरला मतदान, ३ डिसेंबरला मतमोजणी

सर्वोच्च न्यायालयाच्या निर्देशानुसार स्थानिक स्वराज्य संस्थांच्या निवडणुका ३१ जानेवारी अखेरीस पूर्ण करण्याचे बंधन असल्याने निवडणूक आयोगाने त्या दिशेने पहिले पाऊल टाकले असून नगर परिषद आणि नगर पंचायत निवडणुकांची घोषणा केली. पहिल्या टप्प्यात राज्यातील २४६ नगरपालिका आणि ४२ नगर पंचायतींच्या निवडणुकीची घोषणा झाली. मतदार याद्यांमधील घोळ पूर्णपणे मिटवला जात नाही तोपर्यंत निवडणुका घेऊ नका, अशी भूमिका राज्यातील विरोधी पक्षाने घेतलेली आहे. मात्र विरोधकांच्या आपेक्षानंतरही राज्य निवडणूक आयोगाने निवडणुकीची घोषणा केली आहे. २ डिसेंबरला मतदान होईल तर ३ डिसेंबरला मतमोजणी पार पडेल.