BMC Mayor Election : मुंबई सोडून जाऊ नका, ठाकरेंचे नगरसेवकांना आदेश, महापौर निवडणुकीआधी घडामोडींना वेग

शिवसेना ठाकरे गटाचे पक्षप्रमुख उद्धव ठाकरे यांनी आज पक्षाचे प्रमुख नेते, पालिकेतील गटनेते आणि ज्येष्ठ नगरसेवकांची तातडीची बैठक बोलावली आहे. या बैठकीत महापौर आणि उपमहापौर पदासाठी उमेदवार उभा करायचा की नाही, याबाबत अंतिम निर्णय घेतला जाणार आहे. सूत्रांनी दिलेल्या माहितीनुसार, पक्षातील बहुतांश नेत्यांचे मत निवडणूक लढवण्याच्या बाजूने आहे, जेणेकरून सत्ताधारी गटासमोर तगडे आव्हान उभे करता येईल.

निवडणुकीच्या पार्श्वभूमीवर फोडाफोडीचे राजकारण टाळण्यासाठी ठाकरेंच्या शिवसेनेने आक्रमक पाऊल उचलले आहे. पक्षाच्या सर्व नगरसेवकांना ८ फेब्रुवारीपर्यंत मुंबई बाहेर न जाण्याचे कडक आदेश देण्यात आले आहेत. मुंबई महापालिकेच्या महापौर, उपमहापौर निवडणुकीत ठाकरे गट आणि मनसे यांची रणनीती काय असणार, याकडे सगळ्यांचे लक्ष लागले आहे.

दरम्यान, संख्याबळाचा विचार करता, भाजप-शिवसेना शिंदे गटाकडे ११८ नगरसेवक आहेत. राष्ट्रवादी अजित पवार गटाच्या तीन नगरसेवकांचा पाठिंबा मिळाल्यास त्यांची संख्या १२१ वर जाणार आहे. तर, दुसरीकडे विरोधी बाकांवरील एकूण संख्याबळ हे १०० हून अधिक आहे. यामध्ये ठाकरे गट ६५, मनसे ६, काँग्रेस २४, एमआयएम ८, राष्ट्रवादी काँग्रेस शरद पवार गट १, समाजवादी पार्टी २ आदी संख्याबळ आहे.