मुलीमुळं अडकला! खरातशी संगत भोवली, मुंबईच्या बड्या अधिकाऱ्याची रातोरात उचलबांगडी, नेमकं कनेक्शन काय?

शेकडो महिलांचे लैंगिक शोषण आणि कोट्यवधींच्या आर्थिक फसवणुकीचा आरोप असलेल्या अशोक खरात प्रकरणाने आता राज्य प्रशासनाला हादरवून सोडले आहे. राजकीय नेत्यांचे फोटो समोर आल्यानंतर आता भ्रष्ट प्रशासकीय अधिकाऱ्यांची साखळी उघड होत आहे. 'एसआरए'चे उपजिल्हाधिकारी अभिजीत भांडे पाटील यांचे खरातशी आर्थिक लागेबांधे असल्याचे समोर येताच सरकारने त्यांची प्रतिनियुक्ती रद्द करून त्यांची बदली केली आहे. या कारवाईमुळे मंत्रालयातील खरात समर्थक अधिकाऱ्यांमध्ये प्रचंड घबराट पसरली आहे.

advertisement

अधिकाऱ्यावर काय आहेत आरोप?

तपासातून समोर आलेल्या माहितीनुसार, अभिजीत भांडे पाटील यांचे अशोक खरातशी अत्यंत घनिष्ठ संबंध होते. खरातची पत्नी आणि मुलगी यांच्या नावे असलेल्या अनेक जमिनींच्या व्यवहारात भांडे पाटील यांनी मोठी गुंतवणूक केल्याचा संशय आहे. महसूल विभागात महत्त्वाच्या पदावर कार्यरत असताना  खरातच्या अवैध कामांना प्रशासकीय संरक्षण देणे आणि त्याच्या आर्थिक साम्राज्यात वाटेकरी होणे, असे गंभीर आरोप या अधिकाऱ्यावर होत आहेत.

आता पुढचा नंबर कोणाचा? 

या प्रकरणाची व्याप्ती इतकी मोठी आहे की, यापूर्वीच राष्ट्रवादीच्या नेत्या रूपाली चाकणकर यांना राज्य महिला आयोगाच्या अध्यक्षपदाचा राजीनामा द्यावा लागला आहे. चाकणकर या खरातशी संबंधित एका ट्रस्टच्या संचालिका होत्या. आता उपजिल्हाधिकाऱ्यांवर झालेल्या या कारवाईमुळे हे प्रकरण केवळ एका भोंदू बाबापुरते मर्यादित नसल्याचे स्पष्ट झाले आहे.

अनेक अधिकारी पोलीस यंत्रणेच्या रडारवर

अभिजीत भांडे पाटील यांची बदली ही केवळ सुरुवात मानली जात आहे. खरातच्या संपर्कात असलेल्या इतरही काही अधिकाऱ्यांची यादी आता सीआयडी आणि पोलीस यंत्रणेच्या रडारवर आहे. भोंदू खरातच्या चरणी लोटांगण घालणाऱ्या प्रत्येक भ्रष्ट अधिकाऱ्याचा बुरखा फाडला जाईल असे संकेत गृहविभागाकडून मिळत आहेत.