हनुमान जयंती 2026: 15 लाख भाविक येणार, भद्रा मारुतीचं दर्शन घेणार, खुलताबादला कशी सुरुये तयारी?

सध्या उन्हाळा तीव्र असल्याने भाविकांना त्रास होऊ नये यासाठी मंदिरासमोर 150 बाय 200 फुटांचा भव्य मंडप उभारण्यात आला आहे. तसेच भाविकांसाठी आणखी पाच मंडपांची सोय करण्यात आली आहे. दर्शनासाठी पुरुष आणि महिलांसाठी स्वतंत्र रांगा राहणार असून प्रवेश व निर्गमन मार्ग देखील ठेवण्यात आले आहेत. या रांगांचे बॅरिकेडिंगद्वारे शिस्तबद्ध व्यवस्थापन केले जाणार आहे.

advertisement

भिकारदास मारुती मंदिर, तुम्हाला माहितीये का महाराष्ट्रात कुठे? 215 वर्षे आहे जुनं!

कसा असेल कार्यक्रम?

हनुमान जयंतीला पहाटे 4 वाजता महाअभिषेक, तर सकाळी 6 वाजता हनुमान जन्म महाआरती होणार आहे. सकाळी 7 ते 9 भक्तिसंगीत कार्यक्रम, तर 10 ते 12 या वेळेत रामगिरी महाराज यांचे काल्याचे कीर्तन होणार आहे.

दरम्यान, छत्रपती संभाजीनगरसह विविध भागांतून मोठ्या संख्येने भाविक भद्रा मारुतीच्या दर्शनाला येतात. पायी दिंड्या, पालख्या व पताका घेऊन खुलताबादकडे येणाऱ्यांची संख्याही मोठी असते. पायी येणाऱ्या भाविकांसाठी मार्गावर फराळ व पाण्याची व्यवस्था करण्यात आली.

महाप्रसादाचा लाभ

भद्रा मारुतीच्या दर्शनासाठी वाढती गर्दी लक्षात घेऊन दर्शन वेळ वाढवण्यात आली आहे. बुधवारी रात्री 12 वाजेपासून दर्शनास सुरुवात होणार असून गुरुवारी रात्री 12 वाजेपर्यंत मंदिर खुले राहणार आहे. काल्याचे कीर्तन संपल्यानंतर महाप्रसाद वितरण सुरू होईल. हे वितरण संध्याकाळपर्यंत सुरू राहील. त्यामुळे लाखो भाविकांना याचा लाभ मिळणार आहे.

50 सीसीटीव्ही, सुरक्षेची तयारी

मंदिर परिसरात सुरक्षेची पुरेपूर तयारी करण्यात आली आहे. या ठिकाणी 50 सीसीटीव्ही कॅमेरे बसवण्यात आले आहेत. उपविभागीय पोलिस अधिकारी अपराजिता अग्निहोत्री यांच्या मार्गदर्शनाखाली आणि पोलिस निरीक्षक धनंजय फराटे यांच्या नेतृत्वाखाली 38 अधिकारी व 160 कर्मचारी तैनात आहेत. याशिवाय आरसीपीच्या दोन तुकड्या, बॉम्बशोधक पथक, 250 होमगार्ड व 50 खासगी सुरक्षा रक्षक नियुक्त करण्यात आले आहेत.