Hanuman Jayanti 2026: चांगापूरचं प्रसिद्ध हनुमान मंदिर, ‘त्या’ विहिरीला 108 प्रदक्षिणा, पूर्ण होतात मनोकामना, Video

मंदिर परिसरातील प्राचीन विहीर हे या ठिकाणाचे आणखी एक वैशिष्ट्य आहे. या विहिरीची रचना इतकी सुंदर आहे की, ती पाहताना एखाद्या राजवाड्याचा भास होतो. विहिरीच्या सभोवताल भक्कम आणि आकर्षक बांधकाम केलेले आहे. त्याच परिसरात भगवान शंकराचे मंदिरही आहे, ज्यामुळे या स्थळाचे धार्मिक महत्त्व अधिकच वाढते.

स्थानिकांच्या मते, या विहिरीभोवती 108 प्रदक्षिणा मारल्यास मनोकामना पूर्ण होते. अनेकांनी याचा अनुभव घेतल्याचे सांगितले जाते. आजही भाविक हातात नारळ घेऊन विहिरीची प्रदक्षिणा करतात आणि नंतर तो नारळ हनुमंताला अर्पण करतात. ही परंपरा वर्षानुवर्षे सुरू आहे.

या मंदिराचे आणखी एक वैशिष्ट्य म्हणजे समाजोपयोगी उपक्रम होय. श्री वल्लभ बद्रीनाथ लढ्ढा यांनी गोरगरिबांचा विचार करून येथे लग्नसमारंभासाठी जागा उपलब्ध करून दिली आहे. अत्यंत कमी खर्चात परिसर उपलब्ध करून दिला जातो, ज्यामुळे आर्थिकदृष्ट्या दुर्बल कुटुंबांना मोठा दिलासा मिळतो. याशिवाय, येथे महाप्रसादाची सुविधाही उपलब्ध आहे. अनेक भाविक येथे येऊन महाप्रसादाचे आयोजन करतात. विशेष म्हणजे, महाप्रसादासाठी लागणारी भांडी मोफत दिली जातात, हीदेखील एक मोठी सोय आहे.