बॉलिवूडचा असली 'धुरंधर'! ज्याच्या एंट्रीने हादरलं होतं खान्सचं सिंहासन; 3 फिल्सचा वर्षभर धुमाकूळ

2000 वर्ष... हा तो काळ होता जेव्हा शाहरुख खान, सलमान खान आणि आमिर खान हे तीन खान बॉलिवूडवर राज्य करत होते. या त्रिकुटाला तोडणं अशक्य आहे, असा विश्वास प्रेक्षक आणि चित्रपट समीक्षकांचा विश्वास होता. पण मग एक तरुण मोठ्या पडद्यावर आला, ज्याने आपल्या पहिल्याच चित्रपटाने फक्त बॉक्स ऑफिसचं समीकरणच बदललं नाही, तर रातोरात अशी लाट निर्माण केली की खान्सचं सिंहासनही हादरलं.

त्याची पहिलीच फिल्म्स 2000 सालचा सर्वाधिक कमाई करणारा चित्रपट ठरला.  या एकाच वर्षात त्याने अशा 3 फिल्म्स केल्या, ज्या त्या वर्षात सर्वाधिक कमाई करणाऱ्या टॉप 10 फिल्म्समध्ये गणल्या गेल्या. एकाच वर्षात टॉप-10 मध्ये तीन चित्रपट देणं हे कोणत्याही नवीन अभिनेत्यासाठी एक स्वप्न होतं. या चित्रपटाने शाहरुख खानच्या ब्लॉकबस्टर 'मोहब्बतें'लाही मागे टाकलं.

रिपोर्टनुसार या फिल्मने एकूण 92 पुरस्कार जिंकले, याची नोंद गिनीज बुक ऑफ वर्ल्ड रेकॉर्डमध्येही झाली होती. या फिल्मने या अभिनेत्याला रातोरात सुपरस्टार बनवलं.  एकाच चित्रपटासाठी त्याने सर्वोत्कृष्ट डेब्यू आणि सर्वोत्कृष्ट अभिनेता हे दोन्ही फिल्मफेअर पुरस्कार जिंकणारा तो एकमेव अभिनेता ठरला.

हा अभिनेता आहे हृतिक रोशन, ज्याला 'ग्रीक गॉड' म्हणून ओळखलं जातं. त्याची 2000 साली आलेली पहिलीच कहो ना... प्यार है ही फिल्म जी इतकी हिट ठरली की या चित्रपटाने हृतिकला रातोरात सुपरस्टार बनवलं. या फिल्ममधील कहो ना प्यार है आणि एक पल का जीन गाण्याच्या सिग्नेचर स्टेपने संपूर्ण देशाला थिरकायला लावलं. यात हृतिकची दुहेरी भूमिका, त्याची शरीरयष्टी आणि त्याचा अभिनय यांनी खान्सच्या वर्चस्वाला थेट आव्हान दिलं.

'कहो ना... प्यार है'च्या प्रचंड यशानंतर हृतिकने सिद्ध केलं की तो केवळ एक 'चॉकलेट बॉय' नाही. 'मिशन काश्मीर'मध्ये हृतिकने अल्ताफ नावाच्या दहशतवाद्याची भूमिका साकारली होती, जो आपल्या भूतकाळ आणि वर्तमानकाळात संघर्ष करत असतो.  या चित्रपटाने बॉक्स ऑफिसवर खूप चांगली कामगिरी केली आणि 2000 सालचा तिसरा सर्वाधिक कमाई करणारा चित्रपट ठरला. या चित्रपटाने बॉक्स ऑफिसवर खळबळ उडवून दिली आणि सलमानच्या 'दुल्हन हम ले जाएंगे' आणि 'हर दिल जो प्यार करेगा' या चित्रपटांपेक्षा जास्त कमाई केली.

त्याच वर्षी सप्टेंबरमध्ये हृतिक 'फिझा' या चित्रपटात दिसला. त्या काळातील स्टार्स मसाला फिल्म्सच्या मागे धावत असताना हृतिकने एक अत्यंत गंभीर आणि संवेदनशील चित्रपट निवडला. या चित्रपटात त्याने करिश्मा कपूरचा भाऊ अमनची भूमिका साकारली, जो दंगलींनंतर भरकटतो. प्रचलित पद्धतीपेक्षा वेगळा असूनही, 'फिझा' 2000 सालचा आठवा सर्वाधिक कमाई करणारा चित्रपट ठरला.

2000 साली हृतिक रोशनच्या 'ट्रिपल हिट'ने बॉलिवूडमध्ये खळबळ उडवून दिली. त्याच्या चित्रपटाने कमाईच्या बाबतीत आमिर खानच्या 'मेला'लाही मागे टाकले. शाहरुख, सलमान आणि आमिर यांच्या कारकिर्दीच्या सर्वात यशस्वी काळात हृतिकने स्वतःला स्थापित केलं.