BJP Congress Alliance : पुन्हा भूकंपाचे संकेत! भाजप-काँग्रेस युतीच्या चर्चेने राजकीय वर्तुळात खळबळ, कुठं जुळणार समीकरण?

रावेर नगरपरिषदेच्या उपनगराध्यक्ष पदासाठी आज निवडणूक होत असून, संपूर्ण जिल्ह्याचे लक्ष या निकालाकडे लागले आहे. या निवडणुकीत अत्यंत धक्कादायक राजकीय समीकरणे पाहायला मिळण्याची शक्यता आहे. कट्टर विरोधक असलेले भाजप आणि काँग्रेस सत्तेसाठी एकत्र येण्याचे संकेत मिळत आहेत.

सत्तेची गणितं आणि काँग्रेसची 'किंगमेकर' भूमिका

रावेर नगरपालिकेत कोणत्याही एका पक्षाकडे स्पष्ट बहुमत नसल्याने 'सत्तेची चावी' अवघ्या दोन जागा असलेल्या काँग्रेसच्या हाती आली आहे. भाजपकडे ९ अधिक २ अपक्ष असे ११ नगरसेवक आहेत. तर, राष्ट्रवादी काँग्रेस अजित पवार गटाकडे १० नगरसेवक आहेत. तर, काँग्रेसकडे २ नगरसेवक असून राष्ट्रवादी शरद पवार गटाकडे एक नगरसेवक आहे.

advertisement

भाजपला सत्ता स्थापनेसाठी १२ नगरसेवकांच्या पाठबळाची गरज आहे. भाजपकडे स्वतःचे ९ आणि २ अपक्ष मिळून ११ नगरसेवक आहेत. अशा स्थितीत काँग्रेसच्या २ नगरसेवकांनी पाठिंबा दिल्यास भाजपचा आकडा १३ वर पोहोचेल आणि सत्तेचा मार्ग मोकळा होईल.

राजेंद्र चौधरींचे नाव निश्चित?

सूत्रांनी दिलेल्या माहितीनुसार, भाजपच्या गोटातून उपनगराध्यक्ष पदासाठी राजेंद्र चौधरी यांचे नाव निश्चित करण्यात आले आहे. काँग्रेसने भाजपला पाठिंबा देण्याची तयारी दर्शवल्याची चर्चा असून, तसे झाल्यास रावेरमध्ये एक वेगळाच राजकीय प्रयोग पाहायला मिळेल.

राष्ट्रवादी काँग्रेसची रणनीती काय?

दुसरीकडे, १० जागा असलेल्या राष्ट्रवादी काँग्रेसनेही सत्तेसाठी फिल्डिंग लावली आहे. मात्र, काँग्रेसची भूमिका येथे 'किंगमेकर' ठरणार आहे. काँग्रेस भाजपला साथ देऊन राष्ट्रवादीला सत्तेपासून दूर ठेवणार की अन्य काही चमत्कार घडणार, हे आज स्पष्ट होईल.