महायुतीच्या जागांचा तिढा सुटेना, पण काँग्रेसची गाडी मात्र सुस्साट! 12 तासात दुसरी यादी जाहीर

काँग्रेसने 12 तासांत आता दुसरी यादी जाहीर केली आहे. कोल्हापूर पाठोपाठ आता सोलापुरातील उमेदवारांच्या नावांची यादी जाहीर केली आहे. सोलापूर महानगरपालिका निवडणुकीच्या अनुषंगाने काँग्रेसची पहिली यादी जाहीर करण्यात आली. सोलापूर महानगरपालिका निवडणुकीतील काँग्रेसने सर्वात प्रथम आपले उमेदवार मैदानात उतरवले आहेत. महायुतीचं अजूनही ठरत असताना आणि इतर पक्षांची उमेदवारी जाहीर होण्याआधीच काँग्रेसने पहिली यादी जाहीर करून आपला नंबर लावला.

advertisement

काँग्रेस कडून पहिल्यांदी 20 जणांची यादी जाहीर करण्यात आली. काँग्रेसचे शहराध्यक्ष चेतन नरोटे यांना 15 प्रभागातून तिकीट देण्यात आलं. काँग्रेसने जुन्याच सहकाऱ्यावर विश्वास ठेवत उमेदवारी दिली. सोलापूर महानगरपालिका काँग्रेस मित्र पक्षांसोबत लढण्याची शक्यता व्यक्त करण्यात आली आहे.

काँग्रेसने कोल्हापूर महानगर पालिकेतील 48 उमेदवारांची यादी शुक्रवारी रात्री उशीरा जाहीर केली. राज्यात होणाऱ्या मनपा निवडणुकीसाठी काँग्रेसकडून जाहीर झालेली ही पहिलीच यादी आहे. महाराष्ट्र प्रदेश काँग्रेस कमिटीच्या राज्य निवड मंडळाची बैठक प्रदेशाध्यक्ष हर्षवर्धन सकपाळ यांच्या अध्यक्षतेखाली पार पडली.

या बैठकीत खासदार शाहूजी छत्रपती महाराज, विधानपरिषदेतील गटनेते जिल्हाध्यक्ष सतेज पाटील यांच्या सूचनेनुसार व आमदार जयंत आसगांवकर माजी आमदार मालोजीराजी छत्रपती, माजी आमदार ऋतुराज पाटील यांच्या मार्गदर्शनाखाली पक्षाच्या ४८ उमेदवारांची पहिली यादी जाहीर करण्यात आली.