एका कार्यक्रमात बोलताना मुख्यमंत्री फडणवीस यांनी याबाबत माहिती दिली. या कार्यक्रमाला क्रेडाईचे माजी अध्यक्ष डॉमिनिक रोमल, सचिव ऋषी मेहता, माजी सचिव धवल अजमेरा, मुख्य कार्यकारी अधिकारी केवल वलांभिया तसेच रिअल इस्टेट व्यवसायातील अनेक तज्ज्ञ उपस्थित होते.
advertisement
वाढवण बंदर हे महाराष्ट्रातील पालघर जिल्ह्यात प्रस्तावित खोल समुद्री बंदर आहे. पंतप्रधान नरेंद्र मोदी यांनी 30 ऑगस्ट 2024 रोजी या बंदराच्या कामाचं भूमीपूजन केलं होतं. या ऑफशोअर मेगा पोर्ट प्रकल्पाची संकल्पना एनएमआयएसचे फेलो सुरेंद्र शर्मा यांनी डिझाइन केली होती. जवाहरलाल नेहरू पोर्ट अथॉरिटीकडे (जेएनपीए) या बंदराच्या बांधकामाची जबाबदारी आहे. वाढवण हे देशातील पहिले ऑफशोअर पोर्ट असेल ज्यामध्ये बंदर कृत्रिम बेटावर बांधलं जाईल. सी लिंकपासून भाईंदर - विरारपर्यंत जाणारा रस्ता या बंदरापर्यंत आल्यास कनेक्टिव्हीमध्ये मोठा फायदा होईल.
बांधकाम क्षेत्रात अत्याधुनिक बदल आवश्यक
फडणवीस यांनी बांधकाम क्षेत्रातील सुधारणांविषयी मत व्यक्त केलं. ते म्हणाले, "जगभरात उपलब्ध असलेलं नवीन तंत्रज्ञान मुंबईत येणं गरजेचं आहे. बांधकाम क्षेत्रातील आधुनिक तंत्रज्ञानामुळे 80 मजली इमारत केवळ 120 दिवसांत बांधली जाऊ शकते." मुंबईत पुनर्विकासाबरोबरच झोपडपट्टी पुनर्विकास हा दुसरा मोठा संधीचा मार्ग आहे. तसेच क्लस्टर डेव्हलपमेंटमध्येदेखील नवीन संधी निर्माण होत आहेत. मुंबईत जगातील सर्वोत्तम वास्तुकला, आयकॉनिक इमारती, उत्कृष्ट सुविधा निर्माण होत असल्याचंही मुख्यमंत्र्यांनी सांगितलं.