राज्यात स्थानिक स्वराज्य संस्था निवडणुकीची रणधुमाळी सुरू झाली आहे. या रणधुमाळीत महायुतीमधील वाद, कुरघोडी, डाव-प्रतिडाव दिसू लागले आहेत. भाजपने आक्रमक भूमिका घेतली असून विरोधकांसह आपल्याच मित्रपक्षांची कोंडी करण्यास सुरुवात केली आहे.
शिंदेंच्या मंत्र्यांला घेरलं...
नगर परिषद निवडणुकांची चाहूल लागताच नाशिकमध्ये भाजपने आक्रमक मोहीम सुरू केली आहे. मित्रपक्षांशी युती तोडल्यावर आता भाजपने थेट शिवसेनेचे एकमेव जिल्हा मंत्री दादा भुसे यांच्यावरच राजकीय डाव टाकला आहे. नाशिकच्या पालकमंत्रिपदापासून स्वतःला दूर ठेवणाऱ्या भुसेंच्या कट्टर विरोधकांना भाजपमध्ये घेत गिरीश महाजन यांनी भुसेविरोधी राजकीय प्रतिस्पर्धी एकत्र आणण्याचा प्रयत्न सुरू केला आहे. या हालचालींमुळे भुसे चक्रव्यूहात अडकल्याची चर्चा राजकीय वर्तुळात रंगली आहे.
advertisement
राष्ट्रवादी अजित पवारांच्या शिलेदाराची कोंडी...
स्थानिक स्वराज्य संस्थांच्या निवडणुकीत मित्रपक्षांना बाजूला सारत भाजपने स्वतंत्रपणे कूच केली आहे. यात पहिला फटका राष्ट्रवादी आणि शिंदे गटाला बसला. सिन्नरमध्ये शिवसेना ठाकरे गटाचे खासदार राजाभाऊ वाजेंचे काका हेमंत वाजे यांना भाजपमध्ये घेऊन राष्ट्रवादीचे मंत्री अॅड. माणिकराव कोकाटे यांच्या उमेदवारालाच महाजन यांनी थेट आव्हान दिलं. हा निर्णय भाजपच्या व्यापक रणनीतीचा भाग असल्याचं स्पष्ट होत आहे.
शिंदेंच्या विश्वासू नेत्याला घेरलं...
यानंतर दुसरी मोठी चाल मालेगावमध्ये खेळली गेली. माजी आमदार अपूर्व हिरे आणि प्रसाद हिरे यांना भाजपमध्ये सामील करून घेतल्यानंतर आता भुसेंचे कट्टर विरोधक अद्वया हिरे यांनाही पक्षात दाखल करण्यात आलं. पुढील आठवड्यात भुसेविरोधात अपक्ष म्हणून निवडणूक लढवणारे बंडुकाका बच्छाव यांचाही भाजपमध्ये प्रवेश निश्चित असल्याची माहिती मिळत आहे.
या सलग घडामोडींमुळे दादा भुसे यांच्या भोवतीचा ‘राजकीय चक्रव्यूह’ अधिक घट्ट होत चालला आहे. भाजपने विरोधकांना आपल्या गोटात खेचत भुसेंना एकटे पाडण्याचा प्रयत्न सुरू केल्याची स्पष्ट चिन्हं दिसत आहेत. आगामी निवडणुकीत भुसे हा चक्रव्यूह कसा भेदतात, हे नाशिकच्या राजकारणात सर्वाधिक महत्त्वाचे ठरणार आहे.