TRENDING:
लातूर : ग्रामीण भागात गावागावात पोहोचलेली लालपरी हा गावकऱ्यांचा जिव्हाळ्याचा विषय असतो. त्यामुळे लालपरीचा प्रत्येक काम करणारा माणूस हा गावकऱ्यांसाठी घरच्या माणसासारखाच असतो, अशाातच लातूरमधून एक धक्कादायक बातमी समोर आली आहे. लातूर जिल्ह्यातील निलंगा शहरातील एस.टी. बस डेपोमध्ये अचानक एसटी बसला आग लागली होती. आग विझवण्यासाठी प्रयत्न करत असताना ऑपरेटर कर्मचारी गंभीर जखमी झाला होता. आज उपचारादरम्यान त्यांची प्राणज्योत मालवली . या घटनेमुळे लातूर एस.टी. महामंडळात शोककळा पसरली आहे.
advertisement
मिळालेल्या माहितीनुसार, लातूर जिल्ह्यातील निलंगा शहरातील एस.टी. बस डेपोमध्ये १२ मार्च रोजी ही घटना घडली होती. बसवराज मठपती असं मृत ऑपरेट यांचं नाव आहे. नेहमी प्रमाणे एसटी बस ही रात्री डेपोमध्ये दाखल झाली. रात्री ०८ च्या सुमारास निलंगा आगारातील एस.टी. बसमध्ये डिझेल भरत असताना अचानक आगीचा मोठा भडका उडाला. या भीषण आगीत बस पूर्णपणे जळून खाक झाली.
अचानक डिझेलचा भडका उडाल्यामुळे काही क्षणात एस टी बस आगीच्या भक्ष्यस्थानी सापडली. यावेळी डिझेल भरत असलेले एस.टी. महामंडळाचे ऑपरेटर बसवराज मठपती हे या आगीत गंभीररीत्या भाजले होते. घटनेनंतर त्यांना तात्काळ निलंगा येथील शासकीय रुग्णालयात उपचारासाठी दाखल करण्यात आलं होतं. मात्र उपचार सुरू असतानाच त्यांचा मृत्यू झाल्याची दुर्दैवी घटना घडली.
आगीचे कारण अस्पष्ट
दरम्यान, आग इतकी भीषण होती की, सुमारे अर्धा तास परिसरात धुमसत राहिली. आग लागण्याचं नेमकं कारण अद्याप स्पष्ट झाले नसले तरी डिझेल भरत असताना अचानक भडका उडाल्याने ही दुर्घटना घडल्याची प्राथमिक माहिती समोर आली आहे. या घटनेचा अधिक तपास संबंधित यंत्रणांकडून सुरू आहे. बसवराज मठपती यांच्या निधनामुळे एसटी महामंडळाच्या कामगारांवर शोककळा पसरली आहे.