घर खरेदीसाठी कर्ज घेताय का? मग पीएम आवास योजनेची 1.80 लाखाची सबसिडी कशी मिळवायची? प्रक्रिया काय?

शहरातील घरखरेदीसाठी मोठी मदत

प्रधानमंत्री आवास योजना (शहरी) अंतर्गत व्याज अनुदान योजना (Interest Subsidy Scheme – ISS) लागू आहे. या योजनेमुळे गृहकर्ज घेणाऱ्या पात्र लाभार्थ्यांना तब्बल १.८० रु लाखांपर्यंत व्याज सवलत मिळू शकते. ही रक्कम थेट कर्ज खात्यात जमा केली जाते, त्यामुळे कर्जावरील एकूण आर्थिक भार लक्षणीयरीत्या कमी होतो. घर खरेदीचा निर्णय घेताना ही योजना अत्यंत फायदेशीर ठरू शकते.

advertisement

PMAY-शहरीतील चार प्रमुख घटक

प्रधानमंत्री आवास योजना (शहरी) चार वेगवेगळ्या घटकांमध्ये विभागली आहे.जसे की,

पहिला घटक - म्हणजे लाभार्थी-नेतृत्वाखालील बांधकाम (BLC). स्वतःची जमीन असलेल्या आर्थिक दुर्बल घटकातील (EWS) लाभार्थ्यांना घर बांधण्यासाठी सरकारकडून आर्थिक मदत दिली जाते.

दुसरा घटक - अफोर्डेबल हाऊसिंग इन पार्टनरशिप (AHP) असून, झोपडपट्टी पुनर्विकासासाठी खाजगी बांधकाम व्यावसायिकांच्या सहकार्याने घरे बांधली जातात.

तिसरा घटक - अफोर्डेबल रेंटल हाऊसिंग (ARH) असून स्थलांतरित कामगार व भाडेकरूंना स्वस्त भाड्याने घरे उपलब्ध करून देणे हा उद्देश आहे. तसेच चौथा सर्वाधिक लोकप्रिय घटक म्हणजे व्याज अनुदान योजना, जी गृहकर्ज घेणाऱ्यांसाठी लागू होते.

व्याज अनुदान योजना नेमकी काय आहे?

या योजनेअंतर्गत EWS, LIG आणि MIG वर्गातील कुटुंबांना गृहकर्जावर व्याज सवलत दिली जाते. वार्षिक उत्पन्न मर्यादेनुसार पात्र लाभार्थ्यांना ३५ लाखांपर्यंतच्या घरासाठी गृहकर्ज घेता येते. यामध्ये पहिल्या ठरावीक कर्ज रकमेवर सरकारकडून व्याज अनुदान दिले जाते. एकूण मिळून १.८० लाखांपर्यंतची सूट थेट कर्ज खात्यात जमा केली जाते, ज्यामुळे मासिक हप्ता कमी होतो.

अर्ज कसा कराल?

व्याज अनुदान योजनेसाठी अर्ज करण्यासाठी PMAY-शहरीच्या अधिकृत पोर्टलवर ऑनलाइन अर्ज करता येतो. तसेच, ज्या बँकेकडून गृहकर्ज घेतले आहे, त्या बँकेच्या मदतीनेही अर्ज प्रक्रिया पूर्ण करता येते. अर्ज करताना पात्रतेची तपासणी केली जाते आणि आधार प्रमाणीकरण अनिवार्य आहे.

आवश्यक कागदपत्रांची यादी

या योजनेसाठी अर्ज करताना आधार कार्ड, कुटुंबातील सदस्यांचे आधार तपशील, बँक खात्याची माहिती, उत्पन्नाचा पुरावा आणि गृहकर्जाशी संबंधित कागदपत्रे आवश्यक असतात. सर्व माहिती योग्यरीत्या भरल्यानंतर अर्ज सबमिट केला जातो.

अनुदान कसे मिळते?

ही रक्कम थेट बचत खात्यात न येता, गृहकर्जाच्या खात्यात समायोजित केली जाते. त्यामुळे कर्जावरील व्याज कमी होते आणि घराचे स्वप्न अधिक सुलभ होते. एकूणच, प्रधानमंत्री आवास योजना (शहरी) ही शहरातील घरखरेदीसाठी सरकारकडून मिळणारी एक महत्त्वाची आर्थिक मदत ठरत आहे.