TRENDING:
मिरज पंचायत समिती साठी सभापती निवडीपूर्वी सोमवारी दुपारच्या सुमारास बुधगाव-कवलापूर रस्त्यावर असलेल्या एका पेट्रोल पंपाजवळून काही अज्ञात व्यक्तींनी पांडुरंग कृष्णा इंगळे (वय ६७, रा. बुधगाव) यांचे अपहरण केल्याचा संशय व्यक्त केला जात आहे. कारण इंगळे यांची दुचाकी पेट्रोल पंपाजवळ संशयास्पद अवस्थेत उभी आढळून आली आहे. त्यामुळे अपहरणाची शक्यता व्यक्त होत आहे.
advertisement
इंगळे यांचे अपहरण झाल्याच्या संशयाने नातेवाईकांनी सांगली ग्रामीण पोलीस ठाणे गाठून तक्रार सांगितली. पोलिसांनी तत्काळ घटनास्थळी भेट देऊन तपास सुरू केला. इंगळे यांचे खरोखरच अपहरण झाले आहे काय? याची खात्री करण्यासाठी परिसरातील सीसीटीव्ही फुटेज तपासण्याचे काम सुरू करण्यात आले आहे.
घटनास्थळी शिंदेसेनेचे नेते बजरंग पाटील, तानाजी पाटील आदी दाखल झाले. सभापती निवडीच्या पार्श्वभूमीवर हा प्रकार घडल्याची शक्यता व्यक्त होत असून राजकीय वर्तुळात खळबळ उडाली आहे. सांगली ग्रामीण पोलिसांनी केलेल्या प्राथमिक तपासानंतर इंगळे यांचे नातेवाईक रात्री ग्रामीण पोलिस ठाण्यात हजर होते. इंगळे यांच्या मुलाने ग्रामीण पोलिसात तक्रार दिली आहे. सोमवारी रात्री उशिरापर्यंत गुन्हा नोंदवण्याचे काम सुरू होते.