TRENDING:
नेमकं प्रकरण काय?
सौरभ जोशी असं गुन्हा दाखल झालेल्या प्राध्यापकाचं नाव आहे. जोशी हा वर्गामध्ये शिकवत असताना काही विद्यार्थिनींना विनाकारण 'टार्गेट' करत होता. त्यानंतर अभ्यासाच्या किंवा अन्य कामाच्या बहाण्याने तो विद्यार्थिनींना आपल्या केबिनमध्ये बोलावायचा. केबिनमध्ये कोणीही नसल्याचा फायदा घेऊन तो विद्यार्थिनींशी अश्लील वर्तन करायचा, असं तरुणीने तक्रारीत म्हटलं आहे. आरोपीनं कॉलेजमधील चार ते पाच इतर विद्यार्थिनींशी देखील अशाच प्रकारे वर्तन करायचा.
advertisement
केबिनमध्ये बोलवून करायचा अश्लील चाळे
पीडित तरुणीने दिलेल्या तक्रारीनुसार, पीडित तरुणी ही मुळची पंढरपूरमधील रहिवासी असून कोल्हापुरात शिक्षण घेते. येथील केआयटी कॉलेजमध्ये ती सिव्हील एन्व्हायरमेंटच्या दुसऱ्या वर्गात शिकते. याच विभागात सौरभ जोशी एचओडी आहे. २० जानेवारी रोजी आरोपी सौरभ जोशी हा पीडितेच्या वर्गात केमिस्ट्री विषय शिकवायला आला होता. यावेळी त्याने तरुणीवर प्रश्नांचा भडीमार केला. यातील काही प्रश्नांना पीडितेला उत्तरं देता आली नाहीत. यानंतर जोशीनं तिला अभ्यासाबद्दल विचारपूस करण्याच्या बहाण्याने केबिनमध्ये बोलावले, इथं त्याने पीडितेशी समजूत घालून जवळीक साधण्याचा प्रयत्न केला, असं पीडितेनं तक्रारीत म्हटलं आहे.
'ट्रीट मी अॅज यूवर क्लोज फ्रेंड'
एवढंच नाही तर आरोपी जोशी हा इतर विद्यार्थ्यांशी मैत्री करू नको. मला मेसेज करत जा. व्यायाम करत जा. मेडिटेशन करत जा. काही अडचण आली तर मला सांगत जा, असं म्हणत पीडितेच्या जवळ येण्याचा प्रयत्न केला. 'ट्रीट मी अॅज यूवर क्लोज फ्रेंड' असं म्हणत आरोपीनं अश्लील चाळे केल्याचा आरोपही पीडितेनं केला आहे. तसेच फोनवर बोलण्यासाठी शिक्षक फोर्स करत होता, असंही तिने तक्रारीत म्हटलं.
या घटनेनंतर काही दिवसांनी पुन्हा सौरभ जोशीने केबिनमध्ये बोलवलं. बोलता बोलता आपल्याला मिठी मारण्याचा प्रयत्न केला. या प्रकारानंतर मी सरांवर ओरडले. आणि तिथून निघून गेले. पण यानंतर शिक्षकाचा त्रास वाढतच गेला. केबिनमध्ये बोलवू लागला. पण मी गेले नाही. त्यामुळे त्याने वर्गात टार्गेट करायला सुरुवात केली, असंही पीडितेनं तक्रारीत म्हटलं आहे. हा त्रास वाढत गेल्यानंतर अखेर पीडित तरुणीने गोकुळ शिरगाव पोलीस ठाण्यात धाव घेत, तक्रार दाखल केली.
पोलिसांकडून तपास सुरू
गोकुळ शिरगाव पोलिसांनी पीडित विद्यार्थिनींच्या तक्रारीवरून प्राध्यापक सौरभ जोशी याच्याविरुद्ध विनयभंग आणि इतर कलमान्वये गुन्हा दाखल केला आहे. पोलीस या प्रकरणाचा सखोल तपास करत असून, आणखी काही विद्यार्थिनींसोबत असा प्रकार घडला आहे का, याचीही चौकशी केली जात आहे. एका नामांकित कॉलेजमध्ये शिक्षकच अशाप्रकारे विद्यार्थिंनींशी अश्लील वर्तन करत असल्याने परिसरात खळबळ उडाली आहे.