भाजपने शिंदेना कोणती ऑफर दिली?
भाजपने शिंदे यांना २ ऑफर दिल्या आहेत. यात थेट मोदींच्या टीममध्ये सामील होण्याची ऑफर आहे.भाजपकडून मुख्यमंत्री एकनाथ शिंदे यांना केंद्रीय मंत्रिमंडळात स्थान देण्याची भाजपची तयारी आहे, अशी पहिली ऑफर आहे. जर शिंदे यांनी ही ऑफर स्वीकारली तर थेट पंतप्रधान नरेंद्र मोदी यांच्या टीममध्ये सामील होण्याची संधी आहे. तर एकनाथ शिंदे यांना भाजपकडून राज्यात उपमुख्यमंत्रीपदाची ॲाफर दिली आहे. मुख्यमंत्रीपद हे भाजपकडे राहणार आहे. त्यामुळे भाजपने शिंदे यांना दोन ऑफर दिल्या आहेत. एकनाथ शिंदे यांनी केंद्रात जाण्याचा निर्णय घेतला तर राज्याच्या राजकारणातून एक्झिट घ्यावी लागणार आहे.
advertisement
शिवसेना शिंदे गटाची अट काय?
'सीएनएन न्यूज 18' ने दिलेल्या वृत्तानुसार, शिवसेना शिंदे गटाने भाजपसमोर काही अटी ठेवल्या आहेत. मुख्यमंत्रीपदावरील दावा सोडण्यास आपण तयार असल्याचे शिंदे गटाने म्हटले. मात्र, त्याऐवजी काही महत्त्वाच्या खात्यांवर त्यांनी दावा केला आहे. शिंदे गटाने भाजपकडील महत्त्वाची खाती मागितली आहेत. यामध्ये राज्याच्या गृहमंत्रीपदाचाही समावेश आहे. मागील सरकारच्या काळात हे खाते देवेंद्र फडणवीस यांच्या अखत्यारीत होते. त्यामुळे आता भाजपकडून शिंदे गटाची मागणी मान्य होणार का, याकडे सगळ्यांचे लक्ष लागले आहे.
फडणवीसांच्या नावावर होणार शिक्कामोर्तब?
सूत्रांनी दिलेल्या माहितीनुसार, महायुतीच्या मुख्यमंत्रीपदी देवेंद्र फडणवीस यांची निवड निश्चित आहे. भाजप आमदारांच्या बैठकीत गटनेतेपदी देवेंद्र फडणवीस यांची निवड करण्यात येईल. त्यानंतर महायुती सरकारचे मुख्यमंत्री म्हणून देवेंद्र फडणवीस हे शपथ घेतील, अशी माहिती सूत्रांनी दिली. आता याची औपचारिक घोषणा बाकी असल्याची माहिती समोर सूत्रांनी दिली. शुक्रवारी भाजपचे 2 केंद्रीय निरीक्षक मुंबईत दाखल होणार आहेत. त्यांच्या उपस्थितीत भाजपच्या आमदारांची बैठक होणार आहे. या बैठकीत गटनेत्याची निवड करण्यात येणार आहे.