TRENDING:
राज्यातील स्थानिक स्वराज्य संस्थांच्या निवडणुकांमध्ये उभ्या राहिलेल्या अपीलांच्या मुद्द्यावर राज्य निवडणूक आयोगाने निर्णायक पाऊल उचलले आहे. निवडणूक निर्णय अधिकाऱ्यांच्या विविध आदेशांविरुद्ध काही उमेदवारांनी दाखल केलेल्या न्यायालयीन अपीलांमुळे काही नगरपरिषद व नगरपंचायतींची निवडणूक प्रक्रिया अडकली होती. अशा ठिकाणी आता २० डिसेंबरला मतदान आणि २१ डिसेंबरला मतमोजणी होणार असल्याचे आयोगाने स्पष्ट केले आहे.
advertisement
२९ नोव्हेंबर रोजी राज्य निवडणूक आयोगाने जारी केलेल्या आदेशपत्रानुसार, न्यायालयीन अपील व नियमबाह्य कार्यवाहीच्या प्रभावाखालील नगरपरिषद व नगरपंचायतींसाठी सुधारित सार्वत्रिक निवडणूक कार्यक्रम २०२५ जाहीर करण्यात आला आहे. या आदेशाने संबंधित क्षेत्रांतील निवडणूक प्रक्रिया तात्काळ स्थगित करण्यात आली असून जिल्हाधिकाऱ्यांना पुढील टप्पे नव्याने राबवण्याचे निर्देश देण्यात आले आहेत.
निवडणूक आयोगाने म्हटले की, ४ नोव्हेंबर २०२५ रोजी राज्यातील २४६ नगरपरिषद व ४२ नगरपंचायतींसाठी कार्यक्रम जाहीर करण्यात आला होता. मात्र, नामनिर्देशनपत्रांची छाननी झाल्यानंतर दाखल झालेल्या अपीलांचे निकाल २२ नोव्हेंबरनंतर लागू लागले. यामुळे निवडणूक निर्णय अधिकाऱ्यांनी नियमांनुसार उमेदवारांना नामनिर्देशनपत्र मागे घेण्यासाठी आवश्यक असलेला तीन दिवसांचा अवधी न देता थेट मतदान चिन्हे वाटप केली. महाराष्ट्र नगरपालिका निवडणूक नियम १९६६ मधील १७ (१) (ब) या तरतुदींनुसार ही कार्यवाही नियमबाह्य असल्याचे आयोगाने नमूद केले.
ज्या ठिकाणी अपीलांचे निकाल २३ नोव्हेंबर २०२५ किंवा त्यानंतर जाहीर झाले, अशा ठिकाणी संबंधित सदस्यपद किंवा अध्यक्षपद एखाद्या वॉर्डाशी संबंधित असल्यास तेथे संपूर्ण नगरपरिषद किंवा नगरपंचायतीची निवडणूक स्थगित करण्याचा निर्णय आयोगाने घेतला आहे.
>> सुधारित निवडणूक वेळापत्रक
राज्य निवडणूक आयोगाच्या नव्या कार्यक्रमानुसार पुढील टप्पे निश्चित करण्यात आले आहेत :
जिल्हाधिकारी निवडणूक कार्यक्रम जारी करणार – ४ डिसेंबर २०२५
उमेदवारी अर्ज मागे घेण्याची अंतिम तारीख – १० डिसेंबर २०२५, दुपारी ३ पर्यंत
चिन्ह वाटप व अंतिम उमेदवार यादी प्रसिद्धी – ११ डिसेंबर २०२५
मतदान – २० डिसेंबर २०२५
मतमोजणी – २१ डिसेंबर २०२५