TRENDING:
25 वर्षीय सक्षम ताटे आणि 21 वर्षीय आंचल मामीडवार या दोघांचे प्रेमसंबंध होते. आंतरजातीय प्रेमसंबंधाला आंचलच्या भावाचा आणि वडिलांचा विरोध होता. 'तू दुसरा कुणीही आण पण हा नकोच! असं वारंवार सांगितलं गेलं. त्याला मारून टाकू अशीही धमकी देण्यात आली आणि तसं करूनही दाखवलं.
तीन गोळ्या झाडल्या, तरी जिवंत मग...
आंचलने सांगितले की, तीन वर्षांपासून सक्षम ताटेचे आणि माझे प्रेमसंबंध होते. माझ्या घरच्यांना ते मंजूर नव्हते. त्यासाठी माझे वडील गजानन मामीडवार आणि माझे दोन भाऊ हिमेश मामीडवार आणि साहिल मामीडवार यांनी सक्षमचा घात केला. सक्षमवर एमपीडीए पडली होती. त्यानं सुटून आल्यापासून माझ्या घरचे त्याला ठार करण्यासाठी प्रयत्न करत होते. त्यांनी मला धमकी दिली होती की, त्याला मारून टाकणार.
advertisement
सक्षमला त्यांनी गोड बोलून, त्याला भेटून, नशा वगैरे करू घालून मारलं असल्याचे आंचलने सांगितले. आंचलने पुढे सांगितले की, सक्षमवर तीन गोळ्या झाडल्या तरी त्याला काही झालं नाही. तेव्हा त्याच्या डोक्यात फरशी, जड वस्तू टाकून मारलं. आमचं प्रेम होतं पण जातीमुळे विरोध होता असेही तिने सांगितले.
आंचलने केलं सक्षमच्या पार्थिवासोबत लग्न
शुक्रवारी सक्षमवर अंत्यसंस्कार करण्यात आले. त्यापूर्वी प्रेयसी आंचल मामीडवार हिने सक्षम सोबतच लग्न करणार असा निर्णय घेतला आणि त्याप्रमाणे आंचलने सक्षमच्या पार्थिवदेहाला हळद आणि कुंकू लावून लग्न केलं. "आमच्या प्रेम संबंधाला विरोध असल्याने माझ्या वडिलांनी भावाने मारलं. पण, ते हरले आणि माझा प्रियकर मरून पण जिंकला. माझ्यावर कुणाचीही जोर जबरदस्ती नाही. मी माझ्या वडिलांना आणि भावाला जिंकू देणार नाही. मी सक्षमची आहे आणि शेवटपर्यंत सक्षमचीच बनून राहणार' असं म्हणत आँचलने टाहो फोडला. तसंच, प्रियकराच्या मृत्यूनंतरही मी त्याचीच राहणार असा, निर्धार तरुणीने केला.