TRENDING:
संपूर्ण राज्याला हादरवून सोडणाऱ्या खरात प्रकरणाचा भांडाफोड काही महिने आधीच झाला असता, मात्र एका बड्या पोलीस अधिकाऱ्याच्या 'आंधळ्या भक्ती'मुळे खरातला मोकळे रान मिळाल्याची खळबळजनक चर्चा आता रंगू लागली आहे. गुन्हेगाराला बेड्या ठोकण्याऐवजी त्याला वाचवण्याचा आणि उलट तक्रारदारांनाच धडा शिकवण्याचा सल्ला या अधिकाऱ्याने दिल्यामुळे हे प्रकरण दडपले गेल्याचे समोर येत आहे.
advertisement
पोलीस अधिकारी की खरातचा 'सेवक'?
या संपूर्ण प्रकरणात नाशिकमधील एका अतिउच्च पदस्थ पोलीस अधिकाऱ्याची भूमिका संशयाच्या भोवऱ्यात आहे. हा अधिकारी खरातचा इतका मोठा भक्त होता की, खरातच्या मुलीच्या साखरपुड्यात त्याने कौतुकास्पद भाषण केले होते. आपल्या घरचं कार्य असल्यासारखी धडपड, पळापळ या अधिकाऱ्याने केली असल्याचे दिसून आले. ही बाब अनेकांच्या लक्षात आली होती.
जेव्हा खरातने या क्लिप्स या अधिकाऱ्याला दाखवल्या, तेव्हा एका कर्तव्यदक्ष पोलीस अधिकाऱ्याने तत्काळ कारवाई करणे अपेक्षित होते. मात्र, खरातच्या प्रेमापोटी या अधिकाऱ्याने क्लिप्स पाठवणाऱ्यांविरुद्धच खंडणीचा गुन्हा दाखल करण्याचा सल्ला दिला. याच सल्ल्याने खरातचा घात झाला आणि प्रकरणाला वेगळे वळण मिळाले.
तंत्रज्ञानाने उघडले खरातचे 'पाप'
खरातला आलेल्या त्या क्लिप्स केवळ एकदाच पाहता येणार होत्या. पुन्हा पाहण्यासाठी सॉफ्टवेअरची गरज होती. खरातने आपला मोबाईल या 'भक्त' अधिकाऱ्याच्या विश्वासातील पोलिसांकडे सोपवला. पोलिसांनी आपले तांत्रिक कसब पणाला लावून जेव्हा त्या क्लिप्स उघडल्या, तेव्हा त्यातील दृश्ये पाहून स्वतः पोलीसही हादरले. आपल्या साहेबांच्या लाडक्या खरातचे हे रूप पाहून सत्य सांगायचे कसे, असा प्रश्न त्यांना पडला होता. अखेर एकाने हिंमत करून सर्व क्लिप्स अधिकाऱ्याला दाखवल्या.
पोलीस खाक्या दाखवला असता तर...
क्लिप्समधील भयानक वास्तव समोर आल्यानंतरही या अधिकाऱ्यातील 'पोलीस' जागा झाला नाही. उलट, "हे बाहेर आले तर तुमची मोठी बदनामी होईल," असा समजुतीचा सूर काढत त्याने हे प्रकरण दाबण्याचा प्रयत्न केल्याची चर्चा आहे. जर त्याच वेळी या अधिकाऱ्याने कायद्याचा धाक दाखवून खरातवर कारवाई केली असती, तर दोन-चार महिने आधीच या पापाचा घडा फुटला असता.