TRENDING:
नेमकी घटना काय?
मखमलाबाद येथे मामाकडे राहून शिक्षण घेणारी ही मुलगी ४ मार्च रोजी दिंडोरी तालुक्यातील उंबराळे येथे आपल्या आई-वडिलांकडे जाण्यासाठी बसने निघाली होती. बस प्रवासात संशयित आरोपी शिवाजी हिरे याने तिला बसण्यासाठी जागा दिली आणि तिची दिशाभूल केली. तिला उंबराळे येथे उतरू न देता त्याने युक्तीने तिला आपल्या घरी नेले.
advertisement
असा रचला कट
शिवाजी हिरे हा लग्नं जमवण्याचं काम करतो. त्याने रात्रीच आपला भाचा दिलीप महाले आणि त्याचा मुलगा विकास महाले यांना बोलावून घेतलं. या दोघांनी मुलीला हस्ते दुमाला येथे नेले. मात्र, दरम्यानच्या काळात मुलीचा फोटो सोशल मीडियावर व्हायरल झाल्याने आरोपी घाबरले. बिंग फुटू नये म्हणून त्यांनी रोशन जाधव याच्या मदतीने मुलीला वडाळीभोई येथील जंगलात एका निर्जन, पडीक घरात डांबून ठेवलं.
पोलिसांचा 'डिजिटल' तपास आणि कोडवर्ड
सहायक निरीक्षक उमेश बोरसे यांच्या मार्गदर्शनाखाली पोलिसांनी मुलीच्या सुमारे ३० ते ३५ मित्रांची कसून चौकशी केली. तपासादरम्यान एका तरुणाने मुलीला हस्ते दुमाला येथे पाहिल्याचं सांगितलं. पोलिसांनी तातडीने तिथे धाव घेत संशयितांचे मोबाईल ताब्यात घेतले. तपासात धक्कादायक माहिती समोर आली. आरोपी एकमेकांशी संवाद साधण्यासाठी कोडवर्ड वापरत होते.
२ डॉट (..) म्हणजे ऑनलाइन येणे, १ डॉट (.) म्हणजे ऑफलाइन जाणे आणि चॅटिंग झाल्यानंतर मेसेज लगेच डिलीट केले जात होते. पोलिसांनी या तांत्रिक पुराव्यांच्या आधारे वडाळीभोईच्या जंगलात छापा टाकला आणि मुलीची सुटका केली. या प्रकरणी पोलिसांनी गुन्हा दाखल करत चार आरोपींना अटक केली आहे.
तपासात असं समोर आलं आहे की, आरोपी शिवाजी हिरे हा बसस्थानक किंवा बसमध्ये एकट्या असलेल्या मुलींना हेरायचा. लग्नाचं आमिष दाखवून किंवा दिशाभूल करून त्यांना आपल्या घरी न्यायचा. या टोळीने आणखी किती मुलींची अशी फसवणूक केली आहे, याचा तपास आता पोलीस करत आहेत.