TRENDING:
नेमकं प्रकरण काय घडलं?
हरियाणामधील एक व्यक्ती त्र्यंबकेश्वरच्या मंदिरामध्ये दर्शनासाठी आला होता. त्याचा काही कारणामुळे सुरक्षा रक्षकासोबत वाद झाला होता. त्यानंतर झालेल्या झटापटीत सुरक्षा रक्षकांनी भाविकाला मारहाण केली. या घटनेनंतर पुन्हा एकदा मंदिरातील सुरक्षा रक्षकांच्या दादागिरीचा मुद्दा चर्चेत आला आहे. ज्या भाविकाला मारहाण झाली त्याचा शोध न लागल्यामुळे पोलीस शिपाई अमोल गोविंद बोराडे यांच्या फिर्यादीनुसार गुन्हा दाखल करण्यात आला आहे.
advertisement
गुन्हा दाखल
पोलीस शिपायांनी दिलेल्या फिर्यादीनुसार काही सुरक्षा रक्षकांविरोधात गुन्हा नोंदवला आहे. या प्रकरणाचा तपास पोलीस निरीक्षक राजेश देवरे करत आहे. सुरक्षारक्षक पप्पू आचारी (रा. इंदिरानगर, त्र्यंबकेश्वर), तुकाराम बुरूंगे (रा. त्र्यंबकेश्वर) यांच्यासोबत तीन ते चार जणांविरोधात गुन्हा दाखल केला आहे. या घटनेमुळे मंदिरातील सुरक्षा व्यवस्था, भाविकांचे हक्क आणि शिस्त यावर प्रश्न उपस्थित केले जात होते. आता अशातच त्र्यंबकेश्वर पोलिसांकडून सर्व आरोपींवर कोणती शिक्षा होते. हे पाहणं महत्त्वाचं ठरणार आहे.
विश्वस्तांचे स्पष्टीकरण
त्र्यंबकेश्वर देवस्थान ट्रस्टचे विश्वस्त कैलास घुले यांनी व्हिडिओद्वारे स्पष्टीकरण देताना सांगितले की, व्हायरल व्हिडिओतील मारहाण वस्तुस्थितीला धरून नाही. संबंधित भाविक मंदिरात आला होता आणि साधारण तासभर ध्यानसाधनेसाठी बसला होता. गर्दी वाढल्यामुळे दर्शनात अडथळा निर्माण झाल्याने सुरक्षा रक्षकांनी त्याला दक्षिण बाजूच्या दर्शन बारीत बसवले. पण तरीही तो जबरदस्तीने आत शिरला. यानंतर इतर सुरक्षा रक्षकांनी त्याला रोखत मंदिराबाहेर काढले. पुढे चौकशीत संबंधित भाविक ड्रग्जच्या आहारी असल्याचे निदर्शनास आल्याचा दावा घुले यांनी केला. त्यानंतर त्या भाविकाने माफी मागून तेथून निघून गेल्याचे त्यांनी सांगितले.