मुलाने खून केल्याचं समजल्यानंतरही पुत्रप्रेम आडवं आल्याने बापाने पुरावा नष्ट करण्यासाठी मुलाची मदत केली. यामुळे पोलिसांनी वडील आणि मुलगा दोघांना खुनाच्या गुन्ह्यात अटक केली. त्यांना न्यायालयाने सहा दिवसांची पोलीस कोठडी सुनावली आहे. मयत ज्ञानेश्वर गायकवाड याची पत्नी साधना आणि त्यांच्या जवळच राहणारा कार्तिक कोटमे यांचं प्रेमप्रकरण सुरू होतं.
advertisement
मयत ज्ञानेश्वर याला प्रेम प्रकरण समजेल आणि त्यामुळे आपलं फिरणं आणि बोलणं बंद होईल, याची भीती मनात असल्याने कार्तिक याने महिलेच्या पतीला रस्त्यातून बाजूला करण्याचं ठरवलं. त्यासाठी कार्तिकने पंचक येथील मलनिस्सारन जवळील जंगल भागात ज्ञानेश्वर गायकवाड याला पार्टीसाठी बोलावून दारू पाजली. यानंतर त्याच्या छातीवर, पोटावर तीक्ष्ण हत्याराने वार करून खून केला. नंतर कार्तिकने घाबरून वडील सुनील पोपट कोटमे याला याबाबत सांगितलं.
सुनील पोपट कोटमे याने मुलाला पोलिसांच्या ताब्यात देण्याऐवजी पुरावे नष्ट करण्याचा प्रयत्न केला. आरोपीच्या वडिलांनी घरी ओटा बनवण्याच्या कामासाठी आणलेलं सिमेंट रिक्षात नेऊन ज्ञानेश्वर गायकवाड यांच्या मृतदेहावर पसरून देत पुरावा नष्ट करण्याचा प्रयत्न केला. आठ दिवसांनी खुनाची उकल झाल्याने वरिष्ठ पोलीस निरीक्षक देविदास वांजळे यांनी क्लिष्ट गुन्ह्याचा तपास सुरू केला. यानंतर प्रियकर कार्तिक आणि त्याला पुरावा नष्ट करण्यासाठी मदत करणारा त्याचा बाप सुनील कोटमे यांना अटक केली आहे.