चौकशी सुरू असतानाच 3 महिला समोर, अशोक खरात पुरता अडकला, एजंटही ताब्यात

आणखी तीन पीडित महिलांची तक्रार

एसआयटी पथकाने पीडित महिलांना विश्वासात घेऊन त्यांच्याशी संवाद साधला. त्यानंतर या तिन्ही महिला अशोक खरात विरोधात अधिकृत तक्रार देण्यासाठी तयार झाल्या आहेत. खरातने केवळ आध्यात्मिक भीती दाखवूनच नाही, तर आर्थिक आणि मानसिक फसवणूक केल्याचा आरोपही या महिलांनी केला आहे. तक्रार देण्यासाठी तीन महिला समोर आल्याने खरातविरुद्धचा गुन्हा अधिक भक्कम होणार आहे.

advertisement

मालमत्तेचा आकडा पाहून पोलीसही चक्रावले

तपासादरम्यान एसआयटीने खरातची संपूर्ण 'कुंडली' बाहेर काढली आहे. यामध्ये त्याच्या नावावर असलेल्या संपत्तीचा मोठा पसारा उघड झाला आहे. खरातच्या नावावर तब्बल ५२ सातबाऱ्यांची नोंद आढळली आहे. त्याने नाशिक आणि अहिल्यानगर जिल्ह्यात जमिनी खरेदी करत मोठं साम्राज्य उभं केलं आहे. यात सिन्नर, गंगापूर आणि नाशिक शहर परिसरातील मोक्याच्या जमिनींचा समावेश आहे. ५२ पैकी ११ मालमत्ता पूर्णपणे खरातच्या एकट्याच्या नावावर आहेत, तर इतर मालमत्तांमध्ये तो सामाईक भागीदार आहे.

मोठ्या अधिकाऱ्यांशी लागेबांधे?

सर्वात धक्कादायक बाब म्हणजे, खरातच्या सामाईक सातबाऱ्यांवर अनेक बड्या सरकारी अधिकाऱ्यांच्या नातेवाईकांची नावं असल्याची चर्चा सुरू आहे. यामुळे हे प्रकरण केवळ एका भोंदू बाबापुरते मर्यादित नसून, यात मोठे रॅकेट असण्याची शक्यता वर्तवण्यात येत आहे. खरातचे जमीन व्यवहार सांभाळणारा एजंटदेखील आता पोलिसांच्या ताब्यात आहे.

आयकर विभागाची एन्ट्री

फसवणुकीतून जमा केलेल्या या कोट्यवधींच्या मालमत्तेची दखल आता आयकर विभागाने देखील घेतली आहे. पोलिसांच्या अहवालानंतर आयकर विभाग खरातच्या सर्व मालमत्तांचा सखोल तपास करणार आहे. या जमिनी खरेदी करण्यासाठी पैसे कोठून आले आणि व्यवहारातील संशयास्पद नोंदींचा छडा लावला जाणार आहे.