पार्थ पवार जमीन घोटाळा प्रकरणातील निलंबित तहसीलदार मीडियासमोर, 'तो' दावाच फेटाळला, परवानगी कुणी दिली?

या सगळ्या प्रकारानंतर तहसीलदार येवले यांनी माध्यमांसमोर येत आपली बाजू स्पष्ट करण्यात आली. मी असा कोणताही व्यवहार केला नाही. पार्थ पवार जमीन व्यवहाराशी माझा कोणताही संबंध नाही, असे म्हणत आपल्यावरील आरोपांचे खंडन करण्याचा प्रयत्न तहसीलदार येवले यांनी केला.

ती फाईल माझ्याकडे आलीच नाही, तहसीलदार येवलेंचा मोठा दावा

माझ्यापर्यंत निलंबनाची कोणतीही माहिती आली नाही. पार्थ पवार प्रकरणात मी कोणताही व्यवहार केलेला नाही, मला याबद्दल काहीच माहिती नाही, असे तहसीलदार येवले म्हणाले. तसेच जमीन व्यवहाराला आमच्याकडून कोणतीही परवानगी देण्यात आलेली नाही, असे त्यांनी स्पष्ट केले. तसेच परवानगी कुणी दिली, कोणत्या विभागाने दिली याची मला कल्पना नसल्याचे ते म्हणाले. माझ्यावर कोणत्या कारणाने कारवाई केली, हे देखील मला माहिती नाही. माझ्यापर्यंत निलंबनाचा आदेश आल्यानंतर अधिक बाबी स्पष्ट होतील, असे ते म्हणाले.

advertisement

तो दस्तच मी पाहिला नाही

पार्थ पवार यांच्या संबंधाने माझ्याकडे कोणतीच फाईल आली नाही. जमीन व्यवहार प्रस्तावितही झाला नाही. जमीन खरेदीचा जो व्यवहार झाला किंवा दस्त झाला तो सब रजिस्टरच्या अंतर्गत विषय येतो. या प्रकरणात माझ्यावर कोणत्या कारणाने कारवाई झाली, याची मला कल्पना नाही, असे सांगत शासनाच्या कारवाईविषयी त्यांनी आश्चर्य व्यक्त केले. तसेच जमीन व्यवहाराचा दस्तच मी पाहिला नसल्याचे तहसीलदार येवले म्हणाले.

बड्या धेंडांना वाचविण्यासाठी तुम्हाला बळीचा बकरा बनवणे सुरू आहे का?

महार वतनाची भोगवटा २ पद्धतीची जमीन असल्याने वरिष्ठ स्तरावरील परवानगीशिवाय जमिनीचा व्यवहार होणे शक्य नाही. त्यामुळे अतिरिक्त जिल्हाधिकारी किंवा उपजिल्हाधिकारी यांच्या पातळीवरून काही आदेश दिले गेले आहेत का? बड्या धेंडांना वाचविण्यासाठी तुम्हाला बळीचा बकरा बनवणे सुरू आहे का? असे प्रश्न तहसीलदार येवले यांना विचारण्यात आले असता, मला पार्थ पवार यांच्या जमीन व्यवहाराविषयी काहीच माहिती नाही, अगदी परवानगी कुणी दिली याचीही कल्पना नसल्याने मी यासंबंधाने अधिक भाष्य करू शकत नाही, असे म्हणत त्यांनी बोलणे टाळले.

महसूलमंत्री चंद्रशेखर बावनकुळे यांनी माहिती मागवली होती?

महसूलमंत्री चंद्रशेखर बावनकुळे यांनी याआधी तुमच्याकडून काही माहिती मागवली होती का? असे विचारली असता, माझ्याकडून कोणतीही माहिती मागविण्यात आलेली नाही. तसेच वरिष्ठ अधिकाऱ्यांनी देखील कुठल्याही संबंधाने मला विचारणा केलेली नाही, असे त्यांनी स्पष्ट केले.