धनंजय मुंडे 'तो' मुकादम समोर आणला
गरकळ नावाचे मुकादम आहेत, ज्यांचे ट्रॅक्टर माजी खासदारांच्या कारखान्यावर आहेत. त्यांची काही बाकी शिल्लक होती. यावरून काहीसा वाद झाल्याने गरकळ यांना जबर मारहाण करण्यात आली. त्यांना रुग्णालयात दाखल करण्यात आले. मात्र त्यांना काहीही झाले नाही, ते पूर्णपणे तंदुरुस्त (फिट) आहेत, यासाठी मृत महिला डॉक्टरवर दबाव टाकण्यात आला. खासदारांच्या स्वीय सहाय्यकाने महिला डॉक्टरला अनेक वेळा फोन केले, असे सांगत संबंधित गरकळ नावाच्या मुकादमांना धनंजय मुंडे यांनी माध्यमांसमोर आणले. निंबाळकरांच्या माणसांकडून गरकळ यांना कसा त्रास झाला, हे सांगून धनंजय मुंडे यांनी नाईक निंबाळकर यांच्या चौकशीची मागणी केली.
advertisement
सुषमा अंधारे यांनी आगवणे कुटुंबाला समोर आणले
आगवणे कुटुंबातल्या जुळ्या बहि‍णींनी रणजितसिंह नाईक निंबाळकरांच्या कार्यकर्त्यांच्या जाचाला कंटाळून आत्महत्येचा प्रयत्न केल्याचा गंभीर आरोप सुषमा अंधारे यांनी केला. याच अनुषंगाने त्यांनी एक्स माध्यमावर पोस्ट केली. त्यात त्या म्हणतात, ही वर्षा आगवणे.. रणजितसिंह नाईक निंबाळकर यांच्या क्रूर कहाण्यांपैकी एक कहाणी. दिगंबर आगवणेवर सध्या एक, दोन, तीन नाही तब्बल २४ गुन्हे दाखल आहेत. विशेष म्हणजे शाळकरी मुलीवर मकोका सारखे गंभीर गुन्हे निंबाळकरांच्या कृपेने लागले आहेत. निंबाळकरांच्या कार्यकर्त्यांच्या जाचाला कंटाळून याही मुलीने आपल्या जुळ्या बहिणी सकट आत्महत्येचा प्रयत्न केला, सुदैवाने ती वाचली. फलटण पोलीस स्टेशन ही छळ छावणी झाली आहे का?
डॉक्टर तरुणीच्या संस्थात्मक हत्येला कारणीभूत असणाऱ्या सर्व लोकांना चौकशीच्या कक्षेत आणा अशी मागणी सुषमा अंधारे यांनी केली आहे. रणजितसिंह नाईक निंबाळकर तसेच DYSP राहुल धस, रुग्णालय प्रमुख अंशुमन धुमाळ, मयत डॉक्टरच्या जातीवरून, आडनावावरून आणि तिच्या जिल्ह्यावरून तिचा मानसिक छळ करणारे सहाय्यक पोलीस निरीक्षक जायपात्रे, पोलीस निरीक्षक पाटील तसेच ज्या हॉटेलमध्ये डॉक्टर तरुणीचा मृतदेह सापडला ते निंबाळकरांचे कार्यकर्ते दिलीप भोसले या सर्व लोकांवर आरोपपत्र ठेवले जावे, असे अंधारे म्हणाल्या.
निंबाळकरांच्या दबावामुळे आमच्या मुलीचा पीएम रिपोर्ट बदलण्यात आला
माझ्या मुलीचा मृत्यू नैसर्गिक नव्हता, पण त्यावर मृत डॉक्टर तरुणीची सही होती. तिच्यावर बनावट पोस्टमार्टम रिपोर्ट देण्यासाठी नाईक निंबाळकर यांच्याकडून दबाव टाकला गेला होता, असा दावा भाग्यश्री मारुती पांचगणे या महिलेने केला आहे. त्यामुळे साताऱ्याच्या दीपाली निंबाळकर मृत्यू प्रकरण पुन्हा एकदा चर्चेत आले आहे.