TRENDING:
पोलिसांनी दिलेल्या माहितीनुसार, पंढपूरमधील उंबरगाव इथं ही घटना उघडकीस आली आहे. या प्रकरणात समाधान गणपत लोहार (वय ३४) यांचा मृत्यू झाला आहे. तर सारीका लोहार (वय ३२) असं या सूनेचं नाव आहे. २०१३ मध्ये सारीका आणि समाधान यांचं लग्न झालं होतं. पण, लग्नाचे नऊ दिवस संपल्यानंतर सासू विमल आणि सारीका यांच्यामध्ये वाद होत होता. सासू आणि सुनेमध्ये दिवसेंदिवस हा वाद विकोपाला गेला होता.
advertisement
सारीकाचं प्रेम प्रकरण समोर
अशातच चार वर्षांपासून आरोपी सून सारीकाची गावातील शेखर संताराम चंदनशिवे याच्याशी ओळख झाली. ओळखीचं रुपांतर प्रेमात झालं. याची कुणकुण सासू विमल यांना लागली. त्यामुळे त्यांनी सारिकावर संशय घेतला. या कारणावरून विमल आणि सारिका यांच्यामध्ये आणखी वाद पेटला. सासू विमल यांनी सारिकावर संशय घेतला, त्यामुळे दोघांमध्ये कडाक्याचं भांडण झालं. त्यानंतर दोघींनी एकमेकांपासून बोलणं बंद केलं.
सारीकाने सासूला संपवण्याचा रचला कट
१० जानेवारी २०२६ रोजी प्रियकर शेखर याने सारीकाला गावातील एका शेतात बोलावलं. यावेळी त्याने सारिकाला एक पांढऱ्या रंगााची विषारी औषधाची बाटली आणि अर्धवट पाण्याची भरलेली बाटली दिली. आपल्या प्रेमात अडथळा येत असलेल्या सासूला संपवण्यासाठी हे विष आणलं होतं. घरात गेल्यानंतर कळशीमध्ये हे विषारी औषध टाकून दे, असं प्रियकराने साारिकाला समजावलं. घरी गेल्याानंतर सारिकाने रात्री घरात कुणी नसताना सासूच्या पिण्यासाठी असलेल्या कळशीमध्ये विषारी औषध ओतलं. त्यानंतर पाण्याची बाटली जाळून टाकली. सासू विमल यांनी रात्री घरी आल्यावर पिण्यासाठी तांब्याभर पाणी घेतलं पण चव कडू लागली आणि पाण्याचा रंगही पिवळा दिसत होता. त्यामुळे त्यांनी तो तांब्या आपला मुलगा समाधान याला दाखवण्यासाठी घेऊन गेल्या.
पती समाधानने प्यायलं पाणी आणि...
विमल यांनी सारिकाचा पती समाधान याला पाणी दाखवलं आणि तांब्या तिथेच ठेवून दिला. पण, रात्री जेवण झाल्यानंतर समाधान यांनी ताब्यातलं पाणी पिऊन टाकलं. पाणी प्यायल्यानंतर काही तासांनी समाधान यांना उलट्यांचा त्रास सुरू झाला. अचानक तब्येत खालावली. रात्रीच समाधान यांना रुग्णालयात दाखल केलं. जवळपास ६ दिवस समाधान यांच्यावर उपचार सुरू होते. पण, अखेरीस १६ जानेवारी रोजी समाधान यांचा उपचारादरम्यान मृत्यू झाला.
सारिका आणि शेखरला अटक
पोलिसांनी जेव्हा या प्रकरणाचा तपास सुरू केला तेव्हा सगळ्या घटना समोर आला. समाधान यांच्यावर उपचार सुरू असताना घरात विष प्रयोग झाल्याचं पोलिसांच्या निदर्शनास आलं. पोलिसांनी सखोल तपास केला असता सगळा प्रकार उघड झाला. पोलिसांनी सून सारिका लोहार आणि तिचा प्रियकर शेखर संताराम चंदनशिवे या दोघांना ताब्यात घेतलं आहे. पोलिसांनी खाक्या दाखवातच दोघांनी विषारी प्रयोग केल्याचं कबुल केलं. दोघांवर खुनाचा गुन्हा दाखल केला असून अधिक तपास सुरू आहे.