अतिवृष्टीने होत्याचे नव्हते केल्याने आणि हातातोंडाशी आलेला घास हिरावून नेल्याने शेतकरी मोडून पडला. परंतु असे असतानाही शून्य टक्के व्याजदराने घेतलेले कर्ज फेडायला काय झाले? सगळेच कसे फुकट पाहिजे? असे असंवेदनशील वक्तव्य उपमुख्यमंत्री अजित पवार काही दिवसांपूर्वी केले होते. हेच विधान आता त्यांच्या अंगलट आलंय. त्याच कारण ठरलंय पुण्यातील एक जमीन खरेदी घोटाळा. त्यात पार्थ पवारांचं नाव आल्याने उपमुख्यमंत्री अजित पवार अडचणीत आलेत. त्याचं झालं असं पार्थ पवारांच्या अमेडीया होल्डिंग्स एलएलपी कंपनीने तब्बल 1800 कोटी रुपये बाजारभाव असलेली जमीन केवळ 300 कोटी रुपयांत विकत घेतल्याचा गंभीर आरोप करण्यात आलाय. यावरुन आता विरोधकांनी अजित पवारांना त्यांच्याच विधानाची आठवण करुन दिलीय.
advertisement
21 कोटींची स्टँप ड्युटी भरणं अपेक्षित होतं पण केवळ ५०० रुपये स्टँप ड्युटी भरली
सर्वसामान्यांना घर खरेदी करताना घराच्या किमतीच्या 5 ते 7 टक्के स्टँप ड्युटी भरावी लागते. पार्थ पवारांच्या कंपनीनं खरेदी केलेल्या जमीन व्यवहारात सुमारे 21 कोटींची स्टँप ड्युटी भरली जाणं अपेक्षित होतं. मात्र केवळ ५०० रुपये स्टँप ड्युटी भरल्याचा आरोप करण्यात येत आहे.
एकनाथ खडसे यांना मंत्रिपदावर पाणी सोडावं लागलं होतं
पुण्यातील कोरेगाव जमीन व्यवहार घोटाळ्यात पार्थ पवारांचं नाव आल्याने विरोधकांनी थेट अजित पवारांच्या राजीनाम्याची मागणी केलीय. विरोधकांनी याप्रकरणावरुन अजित पवारांना घेरण्यास सुरुवात केल्यानंतर मुख्यमंत्र्यांनी चौकशीचे आदेश दिलेत. भोसरीतील जमीन खरेदीप्रकरणावरून तत्कालीन मंत्री एकनाथ खडसेंना मंत्रिपदावर पाणी सोडावं लागलं होतं.
पार्थ पवारांच्या कंपनीच्या जमीन व्यवहारामुळे आता अजित पवारांची चांगलीच कोंडी झाली आहे. त्यामुळे आगामी काळात अजित पवारांना या प्रकरणाचे राजकीय चटके सहन करावे लागणार हे मात्र निश्चित...!