रेल्वेची 'तत्काळ' तिकीटं काढून स्टेशनवर उभे राहायचे अन्...; 'ते' दृश्य पाहून अधिकारीही चक्रावले, दोघं ताब्यात

नेमकं 'ते' दृश्य काय होतं?

वाठार रेल्वे स्थानकाच्या आरक्षण खिडकीजवळ काही संशयास्पद हालचाली सुरू असल्याची माहिती दक्षता पथकाला मिळाली होती. रेल्वे अधिकारी साध्या वेशात तिथे पाळत ठेवून होते. यावेळी दोन व्यक्ती तिकीट खिडकीजवळ आणि मोबाईलवर काहीतरी गडबड करताना आढळल्या. तिकीट बुकिंगच्या वेळेत सामान्य प्रवाशांना डावलून हे दोघे तिकीटं मिळवत असल्याचे 'ते' दृश्य पाहताच पथकाने झडप घातली आणि दोघांना ताब्यात घेतले.

advertisement

मोबाईल तपासला अन् गुपित उघडलं!

दक्षता पथकाने या संशयितांचे मोबाईल तपासले असता अधिकाऱ्यांचेही डोळे विस्फारले. त्यांच्या मोबाईलमध्ये तब्बल ६० हजार रुपये किमतीची 'सक्रिय' तत्काळ तिकीटं आढळून आली. इतकेच नाही, तर गेल्या काही दिवसांत त्यांनी १ लाख रुपयांहून अधिक किमतीची तिकीटं चढ्या दराने विकल्याचे पुरावेही मिळाले आहेत. ही तिकीटं अवैध आयडी (ID) वापरून आणि यंत्रणेतील त्रुटींचा फायदा घेऊन काढली जात होती.

प्रवाशांची मोठी लूट

हे आरोपी प्रवाशांना तत्काळ तिकीट मिळवून देण्याच्या बहाण्याने जाळ्यात ओढायचे आणि मूळ किमतीपेक्षा कितीतरी पटीने अधिक पैसे उकळायचे. रेल्वे स्थानकावरच उभं राहून हा काळाबाजार बिनधास्तपणे सुरू होता. या कारवाईनंतर आता रेल्वे प्रशासनातील किंवा स्थानिक स्तरावरील कोणाचे या आरोपींना पाठबळ होते का, याचा तपास रेल्वे सुरक्षा दल (RPF) करत आहे.

सामान्य प्रवाशांचे सवाल

या कारवाईमुळे एक प्रश्न पुन्हा ऐरणीवर आला आहे की, जर एजंट काही मिनिटांत तिकीटं बुक करू शकतात, तर सामान्य प्रवाशांची वेबसाईट नेमकी त्याच वेळी स्लो का होते? रेल्वेने आता अशा 'ब्लॅक बुकिंग' करणाऱ्या एजंटांविरुद्ध मोहीम तीव्र केली असून वाठारमधील या कारवाईने दलालांचे धाबे दणाणले आहेत.