सागर सोरती असं मृत आढळलेल्या फुटबॉल खेळाडूचं नाव आहे. त्याने मुंबईच्या अंडर-16 फुटबॉल संघात आपल्या खेळाची छाप सोडली होती. एका उदयोन्मुख खेळाडूचा मृतदेह पालघर जिल्ह्यात संशयास्पद अवस्थेत आढळल्याने मोठी खळबळ उडाली आहे. सागर सोरतीचा मृतदेह पालघर जिल्ह्यातील मेंढवण खिंडच्या घनदाट जंगलात एका झाडाला गळफास घेतलेल्या अवस्थेत आढळून आला. या घटनेने क्रीडा क्षेत्रात हळहळ व्यक्त होत असून, अनेकांना मोठा धक्का बसला आहे.
advertisement
मिळालेल्या माहितीनुसार, सागर सोरती हा १५ नोव्हेंबर रोजी आपल्या घरातून पुण्याला फुटबॉल खेळायला जात असल्याचे सांगून बाहेर पडला होता. मात्र, १६ नोव्हेंबरपासून त्याचा कुटुंबाशी कोणताही संपर्क झाला नाही. कुटुंबियांनी त्याचा शोध सुरू केला असतानाच, दोन दिवसांनी म्हणजेच १८ नोव्हेंबर रोजी कासा पोलिसांना मेंढवण खिंडच्या जंगलात झाडाला लटकलेल्या अवस्थेत एका तरुणाचा मृतदेह आढळला. घटनास्थळी त्याचा मोबाईल फोन असल्याने पोलिसांनी तात्काळ त्याची ओळख पटवली.
मानसिक तणावाखाली होता सागर
सागरने इतके टोकाचे पाऊल का उचलले असावे, याचं कारण अद्याप स्पष्ट झालं नाही. मात्र सागर मागील जवळपास दोन वर्षांपासून मानसिक तणावाखाली होता. याच महिन्यात त्याच्या लहान भावाचे लग्न ठरले होते. तरीही त्याने नवीन कपडे शिवण्यास स्पष्ट नकार दिला होता. या मानसिक तणावामुळेच त्याने आत्महत्येसारखे टोकाचे पाऊल उचलले असावे, असा प्राथमिक अंदाज पोलिसांनी व्यक्त केला आहे.
तपासासाठी मृतदेह जे.जे. रुग्णालयात
या घटनेची नोंद कासा पोलीस ठाण्यात अकस्मात मृत्यू म्हणून करण्यात आली आहे. पोलिसांना या घटनेमागे आत्महत्येचा संशय असला तरी, मृत्यूचं नेमकं कारण शोधण्याचा प्रयत्न पोलीस करत आहेत. सागरचा मृतदेह शवविच्छेदनासाठी मुंबईतील जे.जे. रुग्णालयात पाठवला आहे. शवविच्छेदन अहवाल आल्यानंतरच सागरच्या मृत्यूचं खरं कारण स्पष्ट होईल आणि त्यानंतरच पोलीस पुढील तपास करतील, अशी माहिती पोलीस अधिकाऱ्यांनी दिली आहे.