जालन्याच्या शेतकऱ्यानं घेतलं पैशाचं पीक! एका एकरात 10 लाखांची कमाई, काय केलं? Video

नंदापूर आणि कडवंची परिसरातील जवळपास सर्वच शेतकरी द्राक्ष शेती करतात. परंतु, कोविड काळात द्राक्ष उत्पादकांचे मोठे नुकसान झाले. यामुळे अनेक शेतकऱ्यांनी द्राक्ष बागांवर नांगर फिरवला. नंदापूरचे संदीप उबाळे हे 2017 पासून द्राक्ष शेतीत आहेत. त्यामुळे कोविडनंतर लागलेल्या लॉकडाऊन आणि द्राक्ष बागायतदारांच्या मागे लागलेले शुक्लकाष्ठ त्यांनी अनुभवले आहे. याच काळात त्यांनी एक प्लॉट काढून देखील टाकला. परंतु, दिवस टिकून राहत नाहीत. द्राक्ष उत्पादक शेतकऱ्यांना यंदा उभारू देणारे दर मिळत असल्याने संदीप उबाळे यांना एकरी तब्बल 10 लाख रुपयांचा नफा होत आहे.

उबाळे यांच्याकडे वेगवेगळ्या प्रकारच्या तीन ते चार वाणांची द्राक्षे आहेत. त्यांचा सव्वा एकरचा एक प्लॉट 90 रुपये किलो दराने विक्री झाला असून त्यात त्यांना 150 क्विंटलपर्यंत उत्पादन मिळाले. तर दुसरा 30 गुंठे क्षेत्रातील द्राक्षांची 70 रुपये किलो दराने विक्री झाली असून यातून 90 क्विंटल उत्पादन मिळाले आहे. तर आणखी 3 एकराचा प्लॉट असून त्यात त्यांना 300 क्विंटल उत्पादन होणार आहे. अशा प्रकारे 5 ते 6 एकर द्राक्ष शेतीतून खर्च वजा जाता त्यांना 50 लाख रुपयांचे उत्पन्न मिळण्याचा अंदाज आहे.