Gold Price : ट्रम्प यांच्या एका वक्तव्यानं सोन्याच्या किमती कोसळल्या, काही मिनिटांतच मोठी पडझड! आजचा दर काय?

ट्रम्प यांच्या भाषणाकडे संपूर्ण जगाचे लक्ष लागले होते. गुंतवणूकदारांना अपेक्षा होती की, ट्रम्प इराणसोबतच्या युद्धाबाबत एखादी मोठी शांतता घोषणा किंवा ठोस टाइमलाईन देतील. मात्र, ट्रम्प यांनी युद्ध अजून २-३ आठवडे खेचले जाऊ शकते, असे सूचक विधान केले. या अनिश्चिततेमुळे बाजारात घबराट पसरली आणि गुंतवणूकदारांनी सोन्यातील आपली गुंतवणूक काढून घेण्यास (Profit Booking) सुरुवात केली.

ट्रम्प यांचे भाषण सुरू होताच अवघ्या काही मिनिटांत सोन्याचा भाव ४,७०० डॉलरवरून थेट ४,६८० डॉलरपर्यंत खाली आला. चांदीचा दरही प्रति औंस ७२.४ डॉलरवर पोहोचला. डॉलर वधारल्यामुळे आणि कच्च्या तेलाच्या किमतीतील अस्थिरतेमुळे सोन्यावरील दबाव वाढला आहे. "बाय द रुमर, सेल द फॅक्ट" या धोरणामुळे बाजारात मोठ्या प्रमाणावर 'पॅनिक सेलिंग' पाहायला मिळाली.

जागतिक बाजारातील या पडझडीचे पडसाद भारतीय सराफा बाजारातही उमटण्याची शक्यता आहे. लग्नसराईचा हंगाम सुरू असताना सोन्याच्या दरात झालेली ही घसरण सर्वसामान्यांसाठी काहीसा दिलासा ठरू शकते, मात्र गुंतवणूकदारांसाठी हा मोठा झटका मानला जात आहे. तज्ज्ञांच्या मते, जोपर्यंत युद्धाबाबत ठोस निर्णय होत नाही, तोपर्यंत ही अस्थिरता कायम राहील.

सध्या जागतिक राजकीय घडामोडींचा थेट परिणाम सोन्या-चांदीच्या दरांवर होत आहे. सेफ-हेवन (सुरक्षित गुंतवणूक) म्हणून ओळखल्या जाणाऱ्या सोन्याची मागणी सध्या कमकुवत होताना दिसत आहे. ट्रम्प यांच्या भाषणानंतर बाजारात निर्माण झालेली ही अस्थिरता पुढील काही दिवस कायम राहण्याची शक्यता असून, गुंतवणूकदार आता प्रत्येक जागतिक अपडेटवर बारीक लक्ष ठेवून आहेत.