छातीत तीव्र वेदना
चिखली तालुक्यातील कवठळ येथील रहिवासी असलेले रामदास पडघान (42) हे नेहमीप्रमाणे गावातील ४०-५० भाविकांसोबत पंढरपूरच्या वारीसाठी गेले होते. ५ जुलै रोजी सायंकाळच्या सुमारास ही दुर्दैवी घटना घडली. चंद्रभागा नदीत स्नान करून विठ्ठल मंदिराच्या दिशेने जात असताना, रामदास आणि त्यांच्या सोबतचे भाविक रस्त्यावर फळे विकत घेऊन एका ठिकाणी बसून फळे खात होते. याच दरम्यान, रामदास पडघान यांच्या छातीत तीव्र वेदना सुरू झाल्या.
advertisement
हृदयविकाराच्या झटक्याने निधन
सोबत असलेल्या गावकऱ्यांनी आणि वारीतील सहकाऱ्यांनी क्षणाचाही विलंब न लावता त्यांना तातडीने जवळच्या रुग्णालयात दाखल केले. मात्र, डॉक्टरांनी तपासणी करून त्यांना मृत घोषित केले. हृदयविकाराच्या तीव्र झटक्याने त्याचं निधन झालं. विठुरायाच्या दर्शनासाठी आतुरलेल्या एका भक्ताचा असा अनपेक्षित अंत झाल्याने सर्व वारकरी आणि गावकऱ्यांवर शोककळा पसरली आहे.
पोलिसांचा पंचनामा
दरम्यान, पोलिसांनी घटनास्थळी येऊन पंचनामा केला आणि नैसर्गिक मृत्यूची नोंद दाखल केली. रामदास पडघान यांचा मृतदेह घेऊन पंढरपूरला गेलेले सर्व भाविक आपल्या गावी कवठळ येथे परतले आहेत. रामदास पडघान यांच्या निधनाने त्यांच्या कुटुंबावर दुःखाचा डोंगर कोसळला आहे. घरातील कर्ता पुरुष गेल्याने त्यांच्या पत्नी, एक मुलगा, एक मुलगी आणि वृद्ध आई-वडिलांवर अचानक जबाबदारी आणि दुःखाचा भार पडला आहे.