पैशांसाठी रक्ताचं नातं विसरला, जन्मदात्या बापाला बेल्टनं मारून घेतला जीव, जळगावातील मन हेलावणारी घटना!

नेमकी घटना काय?

भिकन राणा मोरे असं हत्या झालेल्या ६८ वर्षीय व्यक्तीचं नाव आहे. ते चाळीसगाव शहरातील एम.जी. नगर भागात वास्तव्यास होते. त्यांचा मुलगा, आरोपी कल्पेश मोरे, हा गेल्या काही दिवसांपासून नवीन रिक्षा घेण्यासाठी वडिलांकडे पैशांचा तगादा लावत होता. कल्पेशला रिक्षा व्यवसायासाठी वडिलांकडून मोठी रक्कम हवी होती, मात्र घरच्या परिस्थितीमुळे किंवा अन्य कारणांमुळे वडिलांनी पैसे देण्यास नकार दिला.

advertisement

वादाचे पर्यावसान हत्येत

घटनेच्या दिवशी पुन्हा एकदा रिक्षाच्या पैशांवरून पिता-पुत्रामध्ये जोरदार खडाजंगी झाली. वडिलांनी स्पष्टपणे पैसे देण्यास नकार दिल्याने कल्पेशचा संताप अनावर झाला. संतापाच्या भरात त्याने घरात असलेली काठी आणि कमरेचा पट्टा घेऊन आपल्या वृद्ध पित्यावर तुटून पडला. त्याने भिकन मोरे यांना इतकी बेदम मारहाण केली की ते जागीच रक्ताच्या थारोळ्यात पडले आणि गंभीर जखमी झाले.

उपचारापूर्वीच मृत्यू आणि पोलीस कारवाई

रक्ताच्या थारोळ्यात पडलेल्या भिकन मोरे यांना कुटुंबीयांनी तातडीने जवळच्या रुग्णालयात हलवले. मात्र, दुर्दैवाने रुग्णालयात पोहोचण्यापूर्वीच त्यांची प्राणज्योत मालवली. डॉक्टरांनी त्यांना तपासून मृत घोषित केलं. या प्रकरणी मयताची पत्नी सखुबाई मोरे यांनी दिलेल्या फिर्यादीवरून चाळीसगाव पोलिसांनी खुनाचा गुन्हा दाखल केला आहे. पोलिसांनी आरोपी मुलगा कल्पेश मोरे याला अटक केली आहे. घटनेचा पुढील तपास केला जात आहे.