सूत्रं हाती घेताच सुनेत्रा पवार बड्या कॅबिनेट मंत्र्यावर नाराज, नेमकं कारण काय?

सुनेत्रा पवार कोणत्या मंत्र्यावर नाराज?

सुनेत्रा पवार ज्या कॅबिनेट मंत्र्यावर नाराज आहेत, त्या मंत्र्याचं नाव नरहरी झिरवाळ आहे. झिरवाळ यांनी सोमवारी मंत्रालयात उपमुख्यमंत्री सुनेत्रा पवारांसह राष्ट्रवादीच्या वरिष्ठ नेत्यांची भेट घेतली. यावेळी सुनेत्रा पवार झिरवाळ यांच्यावर नाराज झाल्या. मंत्रालयाच्या कार्यालयातील कर्मचारी लाच प्रकरणावरून ही नाराजी व्यक्त केली आहे. स्वतःच्या आणि पक्षाच्या प्रतिमेची काळजी घ्यावी. प्रशासनातील अधिकाऱ्यामुळे बदनामी होणार नाही, याविषयी खबरदारी घ्या, अशा सूचना सुनेत्रा पवार यांनी तसंच पक्षातील वरिष्ठ नेत्यांनी झिरवाळ यांना दिल्या आहेत.

advertisement

सोमवारी मंत्री नरहरी झिरवाळ यांनी सुनेत्रा पवार यांच्यासह पक्षातील वरिष्ठ नेत्यानी भेट घेतली. तेव्हा सुनेत्रा पवार यांनी नाराजी व्यक्त केल्याचं सूत्रांचं म्हणणं आहे. विशेष म्हणजे सुनेत्रा पवार यांनी अलीकडेच अजित पवारांच्या अपघातानंतर अल्पसंख्यांक विभागाकडून ७० संस्थांना परवाने दिल्याप्रकरणी चौकशीचे आदेश दिले होते. यानंतर त्यांनी झिरवाळ यांच्यावर देखील नाराजी व्यक्त केली आहे. यातून कुठेतरी त्यांच्या कामात अजित पवारांच्या कामाची झलक दिसत असल्याची चर्चा आहे.

मंत्रालयातील लाचखोरी प्रकरण काय आहे?

दोन दिवसांपूर्वी मंत्रालयात लाचखोरीचं एक प्रकरण उघडकीस आलं होतं. एक अन्न व औषध प्रशासन खात्याचे मंत्री नरहरी झिरवळ यांच्या मंत्रालयाच्या तिसऱ्या मजल्यावरील कार्यालयात हा प्रकार घडला होता. झिरवळ यांच्या कार्यालयातील राजेंद्र ढेरंग या कर्मचाऱ्याने एका मेडिकल दुकानदाराकडून 35 हजारांची लाच घेतली होती. हे पैसे घेताना लाचलुचपत प्रतिबंधक खात्याच्या अधिकाऱ्यांनी (एसीबी) राजेंद्र ढेरंग यांना रंगेहाथ पकडले. त्यामुळे अन्न व औषध प्रशासन खात्याचे मंत्री असलेल्या नरहरी झिरवळ यांची नाचक्की झाली होती. या घटनेनंतर नरहरी झिरवळ यांनी संबंधित प्रकरणाशी आपला संबंध नसल्याचे स्पष्टीकरण दिले. तसेच या प्रकरणाशी माझा संबंध आढळून आल्यास मी राजीनामा देईन, असा खुलासा त्यांनी दिला होता. मात्र, या प्रकरणात नरहरी झिरवळ यांच्या खासगी पीएनेच राजेंद्र ढेरंग यांना पैसे घेण्यास सांगितल्याची माहिती चौकशीत पुढे आली आहे. या सगळ्या प्रकरणावरून सुनेत्रा पवार यांनी झिरवळांवर नाराजी व्यक्त केली आहे.