'लाच नाही तर वीज पण नाही’ लग्नाच्या दिवशी कापली तार, नवरदेवानं सांगितली अधिकाऱ्याची दादागिरी

शुभकार्यात विघ्न आणणाऱ्या या सरकारी खात्याच्या वागणुकीमुळे सध्या संपूर्ण परिसरात संताप व्यक्त केला जात आहे. नक्की काय घडलं त्या दिवशी? जाणून घेऊया या धक्कादायक घटनेचा सविस्तर वृत्तांत.

घटणा बिजनौरच्या नूरपूर कसब्यातील आहे. 19 फेब्रुवारी रोजी डायमंड सिटी कॉलनीतील शुभम चौहान याची वरात नजीबाबादला जाण्यासाठी सज्ज झाली होती. घरात नातेवाईकांची गर्दी होती, रोषणाईने परिसर लखलखत होता. पण संध्याकाळी 4 वाजता अचानक वीज विभागाचे कर्मचारी तिथे पोहोचले आणि त्यांनी थकीत बिलाचं कारण सांगून वीज कापण्याची धमकी दिली.

advertisement

नवरदेव शुभमने स्वतः पुढे येऊन विनंती केली. पाहुण्यांसमोर कुटुंबाची अब्रू जाईल, असा हवाला दिला. पण ज्युनिअर इंजिनीअरने (JE) लाइनमॅनला खांबावर चढून वायर कापण्याचे आदेश दिले. नातेवाईक आणि मित्रांनी खूप समजावण्याचा प्रयत्न केला, पण वीज कर्मचाऱ्यांनी कोणाचंही ऐकलं नाही. क्षणार्धात घराची रोषणाई बंद झाली आणि मंगलमय वातावरणात काळोख पसरला.

30 हजारांच्या लाचेचा खळबळजनक आरोप

या सर्व प्रकरणामागे केवळ बिल थकीत असणं हे कारण नव्हतं, तर भ्रष्टाचार असल्याचा आरोप नवरदेवाने केला आहे. शुभमच्या म्हणण्यानुसार:

त्याने दोन महिन्यांपूर्वीच सर्व पैसे भरून अधिकृत कनेक्शन घेतले होते.

मीटरच्या रीडिंगनुसार बिलही भरले होते.

पण कोलोनायझर विचित्र नावाच्या व्यक्तीने वीज कनेक्शनच्या नावाखाली ३० हजार रुपयांची लाच मागितली होती.

ही लाच न दिल्यानेच सूडबुद्धीने ही कारवाई करण्यात आल्याचा त्याचा दावा आहे.

भर लग्नात झालेला हा अपमान सहन करत शुभम अखेर नजीबाबादला वरात घेऊन निघून गेला. मात्र, त्याच्या मित्रांनी तातडीने भाड्याने जनरेटर मागवला आणि घर पुन्हा एकदा प्रकाशाने उजळवून टाकलं. सरकारी कर्मचाऱ्यांच्या अशा वागणुकीमुळे एका कुटुंबाच्या आनंदावर विरजण पडलं आहे.

थोडक्यात सांगायचे तर: सण किंवा लग्नसमारंभ हा कोणत्याही कुटुंबासाठी हळवा विषय असतो. अशा वेळी तांत्रिक बाबींच्या नावाखाली लाचखोरीसाठी अडवणूक करणे, हे प्रशासनासाठी लांछनास्पद आहे. या घटनेचा व्हिडिओ सोशल मीडियावर व्हायरल झाल्यानंतर आता वरिष्ठ अधिकारी काय कारवाई करतात, याकडे सर्वांचे लक्ष लागले आहे.