TRENDING:
निर्णय क्रमांक 1 : रेपो दर स्थिर
आरबीआयच्या मॉनेटरी पॉलिसी कमिटीने रेपो दर 5.25 टक्क्यांवर कायम ठेवण्याचा निर्णय घेतला आहे. सलग दुसऱ्यांदा व्याजदरात कोणताही बदल करण्यात आलेला नाही. यापूर्वी फेब्रुवारीमध्येही दर स्थिर ठेवण्यात आले होते, तर डिसेंबरमध्ये 25 बेसिस पॉइंटने कपात करण्यात आली होती. यासोबतच SDF दर 5% आणि MSF दर 5.5% वर कायम ठेवण्यात आले आहेत. हा निर्णय सर्वानुमते घेण्यात आला.
advertisement
निर्णय क्रमांक 2 : महागाईचा अंदाज
आरबीआयने महागाईबाबतही महत्त्वाचे अपडेट दिले आहे. आर्थिक वर्ष 2026-27 (FY27) साठी CPI महागाईचा अंदाज 4.6% ठेवण्यात आला आहे. विशेष म्हणजे प्रथमच कोअर महागाईचा अंदाजही जाहीर करण्यात आला असून तो 4.4% राहण्याचा अंदाज आहे.
निर्णय क्रमांक 3 : एल निनोचा धोका
आरबीआयने एल निनो (El Nino) हा महागाईसाठी मोठा धोका ठरू शकतो असा इशारा दिला आहे. एल निनोमुळे पावसाचे प्रमाण कमी होऊ शकते; ज्याचा परिणाम शेतीवर होतो. त्यामुळे अन्नधान्याच्या किमती वाढू शकतात आणि त्याचा थेट परिणाम सामान्य नागरिकांच्या खर्चावर होऊ शकतो.
निर्णय क्रमांक 4 : GDP वाढीचा अंदाज
आरबीआयने चालू आर्थिक वर्ष 2026-27 साठी देशाच्या वास्तविक जीडीपी वाढीचा अंदाज 6.9% ठेवला आहे. यापूर्वी 2025-26 मध्ये हा दर 7.6% होता. तिमाहीनिहाय अंदाजही जाहीर करण्यात आला आहे.
पहिली तिमाही (Q1) : 6.8%
दुसरी तिमाही (Q2) : 6.7%
तिसरी तिमाही (Q3) : 7%
चौथी तिमाही (Q4) : 7.2%
निर्णय क्रमांक 5 : विदेशी चलन साठा मजबूत
आरबीआय गव्हर्नर संजय मल्होत्रा यांनी सांगितले की 3 एप्रिलपर्यंत भारताचा विदेशी चलन साठा 697.10 अब्ज डॉलर (69,710 कोटी डॉलर) इतका होता. देशाकडे सुमारे 11 महिन्यांच्या आयातीसाठी पुरेसा विदेशी चलन साठा उपलब्ध आहे. ज्यामुळे बाह्य आर्थिक धक्क्यांना तोंड देण्यास मदत होते.