"उत्तर ऐकण्याची हिंमत दाखवा", एपस्टीन कनेक्शनवरून मंत्री हरदीप पुरींची पहिली प्रतिक्रिया; राहुल गांधींच्या आरोपांवर सडेतोड प्रत्युत्तर

“निराधार आरोप करण्याची सवय”

राहुल गांधींचे नाव सुरुवातीला न घेता पुरी यांनी टोला लगावला. “आज एका युवा नेत्याने संसदेत काही गोष्टी मांडल्या. त्यांना निराधार आरोप करण्याची सवय आहे,” असे ते म्हणाले.

यानंतर त्यांनी दोन प्रकारच्या नेत्यांचा उल्लेख करत अप्रत्यक्षपणे गांधींवर निशाणा साधला. “एक प्रकारचे नेते राजकीय व्यवस्थेत जबाबदारी स्वीकारतात, आयुष्य समाजसेवेला वाहतात आणि देशाला 10व्या क्रमांकावरून तिसऱ्या क्रमांकाच्या अर्थव्यवस्थेकडे नेतात. तर दुसरे काही नेते अधूनमधून देशात येतात आणि कोणी ठोस उत्तर दिले की ते ऐकून न घेता सभागृह सोडून जातात,” असा टोला त्यांनी लगावला.

advertisement

एपस्टीन संदर्भातील प्रश्नावर स्पष्टीकरण

राहुल गांधी यांनी “आपली ओळख जेफ्री एपस्टीनशी कोणी करून दिली?” असा प्रश्न उपस्थित केला होता. त्यावर पुरी यांनी स्पष्ट केले की त्यांच्या सर्व व्यावसायिक कामकाजाची माहिती सार्वजनिकरीत्या उपलब्ध आहे. निवृत्तीनंतर काही महिन्यांनी ते इंटरनॅशनल पीस इन्स्टिट्यूट (IPI) या संस्थेत सचिव-जनरल म्हणून रुजू झाले होते, असे त्यांनी सांगितले. त्या वेळी एका माजी ऑस्ट्रेलियन पंतप्रधानांच्या नेतृत्वाखाली संस्था कार्यरत होती.

पुरी यांनी नमूद केले की त्या काळात जागतिक स्तरावरील अनेक व्यक्तींशी त्यांचे व्यावसायिक संपर्क होते. लिंक्डइनचे संस्थापक रीड हॉफमन यांच्यासोबत 13 नोव्हेंबर 2014 रोजी त्यांनी ई-मेलद्वारे संवाद साधला होता. त्या ई-मेलमध्ये जेफ्री एपस्टीन यांना ‘कॉपी’ करण्यात आले होते, असे त्यांनी स्पष्ट केले. “त्या वेळी मी खासगी नागरिक होतो,” असेही त्यांनी अधोरेखित केले.

संसदेत राजकीय संघर्ष तीव्र

एपस्टीन संदर्भातील आरोपांवरून भाजप आणि काँग्रेस यांच्यातील राजकीय संघर्ष अधिकच चिघळला आहे. सरकारने हे आरोप पूर्णपणे फेटाळले असून त्यांना राजकीय हेतूने केलेले वक्तव्य म्हटले आहे. संसदेत झालेल्या या शब्दयुद्धामुळे येत्या अधिवेशनातही या मुद्द्यावरून चर्चा आणि आरोप-प्रत्यारोप सुरू राहण्याची शक्यता व्यक्त होत आहे.