3 वर्षांतील 3 डिसेंबर अन् 3 व्हिलन्स! अक्षय खन्ना, बॉबी, फहाद; कोण आहे सर्वात श्रीमंत?

वर्षाचा शेवटचा महिना म्हणजे डिसेंबर… सगळेच पार्टी, सेलिब्रेन मोडमध्ये असतात. प्रत्येक वर्षाचा डिसेंबर काही ना काही खास आठवणी देऊन जातो. मनोरंजन विश्वासाठीही डिसेंबर महिना नेहमीच महत्त्वाचा ठरतो.

मागील काही वर्षांकडे पाहिलं तर डिसेंबर महिन्याने इंडस्ट्रीला केवळ सुपरहिट सिनेमेच दिले नाहीत तर जबरदस्त व्हिलनही दिले आहेत. विशेष म्हणजे मागील तीन वर्षांत सलग तीन डिसेंबर महिन्यांत असे सिनेमे रिलीज झाले ज्यात हिरोपेक्षा खलनायकच प्रेक्षकांच्या लक्षात राहिले.

1 डिसेंबर 2023 रोजी रिलीज झालेल्या एनिमल या सिनेमाने बॉक्स ऑफिसवर अक्षरशः वादळ उठवलं. रणबीर कपूर मुख्य भूमिकेत असला तरी या सिनेमात बॉबी देओलने साकारलेला अबरार हा खलनायक प्रेक्षकांच्या मनात घर करून गेला. कमी संवाद, बोलके डोळे आणि क्रूरता यामुळे बॉबी देओल पुन्हा एकदा चर्चेत आला. एनिमलने जगभरात तब्बल 900 कोटी रुपयांची कमाई करत ब्लॉकबस्टरचा शिक्का मिळवला.

यानंतर 5 डिसेंबर 2024 रोजी पुष्पा 2 प्रेक्षकांच्या भेटीला आला. अल्लू अर्जुनचा जलवा कायम असतानाच या सिनेमात फहाद फासिलने साकारलेला भंवर सिंह शेखावत हा व्हिलन पुन्हा एकदा केंद्रस्थानी राहिला. त्याच्या अभिनयाने प्रेक्षक अक्षरशः चक्रावले. पुष्पा 2ने बॉक्स ऑफिसवर इतिहास रचत 1,642 कोटी रुपयांची विक्रमी कमाई केली.

आता डिसेंबर 2025 मध्ये धुरंधर या सिनेमाने थिएटरमध्ये धुमाकूळ घातला आहे. या सिनेमात अक्षय खन्नाने साकारलेला रहमान डकैत हा खलनायक सध्या प्रचंड चर्चेत आहे. शांत, धोकादायक आणि बुद्धिमान असा हा व्हिलन प्रेक्षकांना अक्षरशः खिळवून ठेवतोय. धुरंधरने अवघ्या काही दिवसांत 1000 कोटींच्या जवळपास मजल मारली आहे.

तिन्ही सिनेमात हिरोंपेक्षा व्हिलनच जास्त भाव खाऊन गेला. या तिघांच्या सिनेमांनी कोटी रुपये कमावले पण संपत्तीच्या बाबतीत हे तिघेही कमी नाहीत. तिघांची संपत्ती किती आहे पाहूयात.

धुरंधरचा रहमान डकैत म्हणजेच अभिनेता अक्षय खन्ना एकूण 167 कोटींचा मालक आहे. तो एका सिनेमासाठी 2 कोटी रुपये घेतो.

पुष्पा 2 चा फहाद फासिल 50 कोटी रुपयांचा मालक असल्याची माहिती आहे. तो एका सिनेमासाठी 6 कोटी रुपये मानधन घेतो असं म्हणतात.

एनिमलमधील बॉबी देओलकडे वडिलोपार्जित खूप संपत्ती आहे. त्याच्याकडे 66 कोटींची वैयक्तिक मालमत्ता आहे.

मागील तीन वर्षांतील डिसेंबरने बॉलीवूड आणि साऊथ इंडस्ट्रीला तीन दमदार व्हिलन दिले आहेत. जे केवळ सिनेमांपुरते मर्यादित न राहता प्रेक्षकांच्या मनात कायमचे घर करून गेले आहेत.