Nana Patekar Son: नाना पाटेकरांचा मुलगा त्यांच्यासारखाच रफ अ‍ॅंड टफ, ग्लॅमर जगापासून दूर, पण नेमकं काय करतो?

बॉलिवूडमधील काही कलाकार आपल्या अभिनयाने प्रेक्षकांच्या मनावर कायमचे घर करून जातात. अशाच प्रतिभाशाली अभिनेत्यांमध्ये नाना पाटेकर यांचे नाव घेतले जाते. अभिनयासोबतच ते उत्तम लेखक आणि चित्रपट निर्माते देखील आहेत.

नाना पाटेकर यांना राष्ट्रीय पुरस्कार, फिल्मफेअर पुरस्कार यांसारख्या प्रतिष्ठित सन्मानांसोबत त्यांना पद्मश्री पुरस्काराने देखील गौरविण्यात आले आहे. नाना पाटेकर हे बॉलिवूड आणि मराठी इंडस्ट्रीतील मोठं नाव. मात्र त्यांचा मुलगा कधी पाहिलाय का? ग्लॅमर जगापासून दूर नाना पाटेकरचा मुलगा काय काम करतो? याविषयी जाणून घेऊया.

नाना पाटेकर यांचा मुलगा मल्हार पाटेकरला लहानपणापासूनच चित्रपटसृष्टीत काम करण्याची आवड होती. त्याला प्रकाश झा यांच्या चित्रपटात काम करण्याची संधी मिळत होती, मात्र नाना पाटेकर आणि प्रकाश झा यांच्यात काही कारणास्तव वाद झाला, त्यामुळे मल्हारने या चित्रपटातून माघार घेतली.

मल्हार पाटेकरने राम गोपाल वर्माच्या 'द अटॅक ऑफ 26/11' या चित्रपटात सहाय्यक दिग्दर्शक म्हणून काम केले. आज तो स्वतःचे प्रोडक्शन हाऊस चालवतो, ज्याचं नाव 'नाना साहेब प्रॉडक्शन हाऊस' आहे. हे प्रोडक्शन हाऊस त्याने आपल्या वडिलांच्या नावावरून सुरू केले आहे.

नाना पाटेकर आणि त्यांच्या पत्नी नीलकांती पाटेकर अनेक वर्षांपासून वेगळे राहत आहेत, मात्र त्यांनी अधिकृतरित्या घटस्फोट घेतलेला नाही. मल्हार पाटेकर आपल्या आईच्या खूप जवळ राहतो.

मल्हारला एक मोठा भाऊ देखील होता, पण काही काळानंतर त्याचा मृत्यू झाला. या दु:खातून सावरायला नानांना खूप वेळ लागला. मात्र, मल्हारच्या जन्मानंतर त्यांना पुन्हा आनंद मिळाला.

आज मल्हार लाईमलाईटपासून दूर असूनही आपल्या कामात मोठी भरारी घेत आहे. तो प्रोडक्शन हाऊससाठी भरपूर मेहनत घेत आहे.