'त्यांनी कट रचला, माझं गर्भाशय काढलं', गायक उदित नारायण पुन्हा अडचणीत; पहिल्या पत्नीचे गंभीर आरोप

प्रसिद्ध पार्श्वगायक उदित नारायण गेल्या काही महिन्यांपासून त्यांच्या कौंटुबिक वादात अडकले आहेत. अशातच त्यांच्या पहिल्या पत्नीने त्यांच्यावर पुन्हा एकदा गंभीर आरोप केलेत. त्यांची पहिली पत्नी रंजना नारायण झा यांनी सुपौल महिला पोलिस ठाण्यात उदित नारायण आणि त्यांच्या दोन भावांविरुद्ध आणि त्यांच्या दुसऱ्या पत्नीविरुद्ध गंभीर गुन्हेगारी आरोपांसह तक्रार दाखल केली आहे. नेमकं काय आहे हे प्रकरण पाहूयात. 

रंजना यांनी आरोप केलेत की, गुन्हेगारी कट रचण्याचा भाग म्हणून उपचारांच्या बहाण्याने तिच्या नकळत तिचं गर्भाशय काढून टाकण्यात आलं. फसवणूक, छळ आणि वचनभंगाचे आरोपही केले आहेत. आता आजारपण आणि आर्थिक अडचणीत रंजना यांनी न्यायाच्या आशेनं पोलिसांत धाव घेतली आहे. 

उदित नारायण यांच्या पहिल्या पत्नी रंजना झा यांचं 7 डिसेंबर 1984 रोजी पारंपरिक पद्धतीनं लग्न झालं. लग्नानंतर काही काळानंतर उदित आपल्या करिअरसाठी मुंबईला गेले. तेव्हाच दोघांचं वैवाहिक आयुष्य खऱ्या अर्थानं दुरावलं असं रंजना यांनी सांगितलं. त्यानंतर माध्यमांद्वारे त्यांना कळलं की उदित यांनी पुन्हा लग्न केलं आहे. त्यांनी याबद्दल विचारणा केली तेव्हा त्यांना योग्य उत्तर मिळालं नाही. 

 रंजना झा यांनी त्यांच्या अर्जात केलेला सर्वात गंभीर आरोप 1996 मधील एका घटनेशी संबंधित आहे. त्यांचा दावा आहे की त्यांना उपचारासाठी दिल्लीतील एका मोठ्या रुग्णालयात नेण्यात आलं होतं.  त्यांच्या स्पष्ट संमतीशिवाय त्यांचं गर्भाशय काढून टाकण्यात आलं. त्यांना हे खूप नंतर म्हणजेच दुसऱ्या उपचारादरम्यान कळलं. हा सुनियोजित कट असल्याचं त्यांनी सांगितलं आहे. या घटनेमुळे त्या शारीरिक आणि मानसिकदृष्ट्या खचल्या असंही त्यांनी सांगितलं.

रंजना झा यांनी म्हटलं आहे की, जेव्हा ती तिच्या शेवटच्या काळात मुंबईत आली तेव्हा तिला तिच्या पतीच्या घरी हक्काचं स्थान नाकारण्यात आलं. घरात प्रवेशही दिला गेला नाही. त्यानंतर ती नेपाळमधील तिच्या सासरच्या घरी गेली परंतु तिथेही तिला कोणताही आधार मिळाला नाही. शेवटी त्या माहेरी निघून आल्या. 

रंजना झा आता 61 वर्षांच्या आहेत आणि या वयात त्या आरोग्याच्या समस्या आणि आर्थिक अडचणींशी झुंजत आहेत. वारंवार आश्वासन देऊनही त्यांना कोणतीही ठोस मदत मिळाली नाही. म्हणूनच पुन्हा एकदा महिला पोलिस ठाण्यात अर्ज दाखल केला आहे.  कोणत्याही सूडासाठी नाही तर त्यांच्या प्रतिष्ठेसाठी आणि हक्कांसाठी लढत आहे, असं त्यांनी म्हटलं आहे.  

सुपौल महिला पोलिस ठाण्यात दाखल केलेल्या अर्जानंतर पोलीस तपास प्रक्रिया सुरू करतील. आरोप गंभीर आहेत आणि प्रत्येक पैलूची कायदेशीर तपासणी आवश्यक आहे. दरम्यान या नवीन आरोपावर उदित नारायण किंवा त्यांच्या कुटुंबाकडून कोणतीही प्रतिक्रिया समोर आलेली नाही.  या आरोपाची सत्यता आता पोलीस प्रक्रियेद्वारे तपासली जाईल. सध्या हा एका पक्षाचा दावा आहे आणि कायदेशीररित्या अद्याप पडताळणी झालेली नाही.