Montha Cyclone update: 2 चक्रीवादळांमध्ये अडकला महाराष्ट्र, एकाचा स्पीड 110 तर दुसरं 50 किमी वेग, कुठे धडकणार?

अरबी समुद्रात डीप डिप्रेशन तयार झालं आहे. तर पश्चिम बंगालच्या उपसागरात मोंथा चक्रीवादळ आलं आहे. येत्या 24 तासांत त्याची तीव्रता वाढणार आहे. एकीकडे वादळ तर दुसरीकडे चक्रीवादळ यामध्ये महाराष्ट्राचं मोठं नुकसान होत आहे. दक्षिणेकडील राज्यांमध्ये अति मुसळधार पाऊस आणि रेड अलर्ट दिला आहे.

बंगालच्या उपसागरात तयार झालेले मोंथा चक्रीवादळ 28 ऑक्टोबर रोजी आंध्र प्रदेश आणि ओडिशाच्या किनारपट्टीवर धडकण्याची शक्यता आहे, ज्यामुळे दोन्ही राज्यांमध्ये भीतीचे वातावरण आहे. हे वादळ आंध्र प्रदेशच्या किनारी भागात, मच्छलीपट्टणम आणि कलिंगपट्टणम दरम्यान काकीनाडा जवळ धडकेल असा अंदाज आहे.

चक्रीवादळाच्या संभाव्य धोक्यामुळे आंध्र प्रदेशातील किमान पाच जिल्हे हाय अलर्टवर आहेत. या जिल्ह्यांमध्ये काकीनाडा, पूर्व गोदावरी, कोनासीमा, एलुरु आणि पश्चिम गोदावरी यांचा समावेश आहे. स्थानिक प्रशासनाने तातडीने आपत्कालीन उपाययोजना सुरू केल्या आहेत:

किनाऱ्यालगतच्या धोकादायक भागातून लोकांना सुरक्षित स्थळी हलवण्याचे काम सुरू आहे. काकीनाडा येथील होप आयलंड भागातील लोकांना सुरक्षित झोनमध्ये हलवले जात आहे. अतिवृष्टी आणि वादळाच्या भीतीमुळे या भागातील शाळा २७ ते ३१ ऑक्टोबर या कालावधीत बंद ठेवण्यात आल्या आहेत.

मच्छीमारांना समुद्रात न जाण्याचा स्पष्ट इशारा देण्यात आला आहे. ओडिशामध्येही वादळाच्या तीव्रतेमुळे प्रशासनाने ८ जिल्ह्यांना 'रेड झोन' म्हणून घोषित केले आहे. या जिल्ह्यांमध्ये या वादळाचा सर्वाधिक गंभीर परिणाम होण्याची शक्यता आहे. मालकानगिरी, कोरापुट, नबरंगपूर, रायगडा, गजपती, गंजम, कंधमाळ आणि कालाहांडी. यांना रेड झोन घोषित केलं आहे.

या सगळ्याचा महाराष्ट्रावर परिणाम होणार आहे. हवामान तज्ज्ञ अमित भारद्वाज यांनी दिलेल्या माहितीनुसार 28 ऑक्टोबर रोजी विदर्भ-मराठवाड्यात यलो आणि ऑरेंज अलर्ट जारी करण्यात आला आहे. विदर्भाच्या आजूबाजूच्या पट्ट्यात रेड अलर्ट हवामान विभागाने जारी केला आहे. दक्षिणेकडील राज्यांमध्ये सलग दुसऱ्या दिवश ऑरेंज अलर्ट देण्यात आला आहे. महाराष्ट्रात मोंथा चक्रीवादळामुळे पुन्हा एकदा पावसाचं संकट आलं आहे.

हवामान तज्ज्ञ अमित भारद्वाज यांच्या म्हणण्यांनुसार, 29 सप्टेंबर रोजी पुन्हा एकदा मध्य भारतात आणि महाराष्ट्रात देखील मुसळधार पावसाचा अंदाज वर्तवण्यात आला आहे. महाराष्ट्रात तळ कोकण, उत्तर महाराष्ट्र, विदर्भ आणि मध्य महाराष्ट्राचा काही पट्ट्यात मेघगर्जना आणि वादळी वाऱ्यासह मुसळधार पाऊस होणार आहे. ३० ऑक्टोबर रोजी कोकण, मध्य महाराष्ट्र आणि विदर्भात पावसाचा इशारा देण्यात आला आहे. 31 ऑक्टोबर रोजी पावसाचा जोर कमी होईल आणि हलक्या स्वरुपाचा राहणार आहे. त्यानंतर महाराष्ट्रात नोव्हेंबरच्या पहिल्या आठवड्यात तूर्तास पावसाचा कोणताही अंदाज वर्तवण्यात आलेला नाही.