TRENDING:
अमित बॅनर्जी हे 1974 सालापासून रक्तदान चळवळीशी जोडले गेले आहेत. त्यांच्या जवळच्या एका व्यक्तीला रक्ताची गरज भासल्याने त्यांनी त्या काळात रक्तदान केले आणि तेव्हापासून आजपर्यंत ते या मोहिमेसाठी सातत्याने काम करत आहेत. त्यांनी भारतभर अनेक रक्तदान शिबिरांचे आयोजन करत जनजागृती केली आहे. प्रयागराज परिसरात त्यांनी पहिल्यांदा रक्तदान शिबिर आयोजित केले होते. त्या काळात रक्तदानाबाबत अनेक गैरसमज असतानाही त्यांनी पुढाकार घेत काम सुरू ठेवले.
advertisement
रक्तदानासोबतच ते अवयवदानासाठीही कार्यरत असून त्यांनी त्याच्या कुटुंबातील सदस्यांचे अवयवदान केले आहे. तसेच इतरांनाही अवयवदानासाठी प्रेरित करत शिबिरे आयोजित करतात. त्यांच्या कार्यामुळे अनेकांना जीवनदान मिळाले आहे. रक्तदानाचा चौक असावा पुण्यात रक्तदान अधिक सोपं आणि सर्वसामान्यांसाठी सहज उपलब्ध व्हावं, यासाठी पुण्यात रक्तदानाचा चौक उभारण्यात यावा, अशी अनोखी संकल्पना अमित बॅनर्जी यांनी मांडली आहे.
या चौकात नागरिकांना एका ठिकाणी रक्तदानाची सुविधा उपलब्ध होईल. त्यामुळे लोकांना रक्तदानासाठी वेगवेगळ्या ठिकाणी जाण्याची गरज भासणार नाही आणि रक्तदान करणे अधिक सोपे होईल. या ठिकाणी रक्तदानासोबतच अवयवदानाबाबतही माहिती देण्यात येईल. अवयवदानाविषयी जनजागृती करून नागरिकांना अवयवदानासाठी प्रेरित करण्याचे काम केले जाईल. या उपक्रमामुळे पुण्यातील रक्ताची कमतरता मोठ्या प्रमाणात कमी होईल आणि अवयवदानाचे प्रमाणही वाढेल, असा विश्वास अमित बॅनर्जी यांनी व्यक्त केला आहे.