सुखोई 30 विमान अपघात: 15 दिवसांपूर्वी लग्नाची चर्चा अन्... अपघातात महाराष्ट्राचे सुपुत्र पूर्वेश दुरुगकर शहीद

नागपूर, प्रतिनिधी उदय तिमांडे: ज्या हातांनी १५ दिवसांपूर्वी लाडक्या बहिणीचं स्वागत केलं, ज्या डोळ्यांनी वडिलांनी पाहिलेलं लग्नाचं स्वप्न साठवलं आणि ज्या जिद्दीने आकाशाला गवसणी घातली, तोच नागपूरचा सुपूत्र सुखोई 30 विमान अपघातात शहीद झाला.फ्लाइट लेफ्टनंट पुर्वेश दुरुगकर असं वैमानिकाचं नाव आहे.

पूर्वेशच्या जाण्याने केवळ एका कुटुंबाचा आधार हिरावला नाही, तर नागपूरने आपला एक ध्येयवेडा लढाऊ वैमानिक गमावला आहे. घरात प्रेमाने 'नंदू' म्हणून ओळखला जाणारा पूर्वेश सुरुवातीपासूनच अभ्यासात आणि धाडसात पुढे होता. त्याचे वडील रवींद्र दुरुगकर (सेंट्रल रेल्वेमध्ये ट्रान्सपोर्ट इन्स्पेक्टर) आणि आई संध्या दुरुगकर यांनी आपल्या मुलाला त्याच्या स्वप्नांनुसार घडवलं.

अवघ्या १५ दिवसांपूर्वीच पूर्वेशची बहीण, जी आयआयटीमधून शिकून अमेरिकेत स्थायिक झाली आहे, ती नागपुरात आली होती. दोघे बहीण-भाऊ एकत्र होते, घरात आनंदाचं वातावरण होतं. वडील त्याच्या लग्नासाठी मुली बघत होते, पण नियतीला काहीतरी वेगळंच मान्य होतं.

डॉ. आंबेडकर कॉलेज, नागपूर येथून कॉम्प्युटर सायन्समध्ये बी. एस्सी. डीग्री पूर्ण केली. त्यांनी महाराष्ट्र संचलनालयाचे प्रतिनिधित्व करत ६ राष्ट्रीय NCC शिबिरांमध्ये सहभाग घेतला होता. एरो मॉडेलिंग स्पर्धांमध्ये त्याने आपली विशेष छाप पाडली होती. AFCAT परीक्षा उत्तीर्ण करून सप्टेंबर २०२१ मध्ये हैदराबादच्या एअर फोर्स अकॅडमीत (AFA) प्रवेश घेतला आणि लढाऊ वैमानिक बनण्याचे बालपणीचे स्वप्न पूर्ण केले.

2 वर्ष आधी पूर्वेश च्या वडिलांनी स्वप्नपूर्ती सोहळा घेत ज्यांनी ज्यांनी पूर्वेशच्या वाटचालीत योगदान दिले त्यांना निमंत्रित केले होते, पूर्वेश असा अचानक जाईल अस स्वप्नांत देखील वाटत नाही अश्या भावना त्याच्या परिसरातील नागरिकांनी सांगितलं

लढाऊ विमान उडवताना झालेल्या भीषण अपघातात पूर्वेशने देशासाठी सर्वोच्च बलिदान दिलं. एकीकडे त्याच्या शौर्याचा अभिमान असला, तरी दुसरीकडे एका उमद्या तरुणाच्या अकाली जाण्याने दुरुगकर कुटुंबावर दुःखाचा डोंगर कोसळला आहे. नागपूरचा हा सुपुत्र आपल्या शौर्याच्या आणि स्मृतींच्या रूपाने कायम आपल्या आठवणीत राहील.