Share Market: मैदानात हिटमॅन, शेअर बाजारात किंग! रोहित शर्माने ९००% रिटर्न देणाऱ्या मल्टीबॅगर स्टॉकमध्ये लावला मोठा डाव

बॉलिवूड स्टार, व्यावसायिक उद्योजकांप्रमाणेच आता भारतीय क्रिकेटपटूही शेअर बाजारात मोठ्या आत्मविश्वासाने आपली गुंतवणूक करत आहेत. मैदानातील यशस्वी कामगिरीनंतर, शेअर मार्केटमध्ये अनेक खेळाडूंनी आपले नशीब आजमावले आहे. यामध्ये भारतीय संघाचा हिटमॅन म्हणून ओळखला जाणारा कर्णधार रोहित शर्मा याचे नाव आघाडीवर आहे, जो आता गुंतवणुकीच्या विश्वातही आपली ओळख निर्माण करत आहे.

रोहित शर्माने शेअर बाजारात लिस्टेड असलेल्या एका टेक्सटाईल कंपनीत मोठी गुंतवणूक केली. स्वराज सूटिंग या कंपनीच्या शेअर्सवर त्याने गुंतवणूक केली आहे. हा एक मल्टीबॅगर स्टॉक आहे. या स्टॉकमध्ये मागील पाच वर्षांत आपल्या गुंतवणूकदारांना ९०० टक्क्यांपेक्षा जास्त रिटर्न देऊन अक्षरशः मालामाल केलं होतं.

रोहित शर्मासोबतच, तिलक वर्मा यानेही या स्टॉकमध्ये पैसे लावले आहेत. त्यामुळे गुंतवणूकदारांचे या शेअरकडे लक्ष वेधले गेले असून, आगामी काळात यात आणखी तेजी येण्याची शक्यता आहे. या दोघांमुळे त्यांचे चाहते देखील आता या शेअर्सवर लक्ष ठेवून आहेत. या शेअरची किंमत वाढली तर यामध्ये पैसे लावणाऱ्यांची चांदी होणार आहे.

स्वराज सूटिंग कंपनीने प्रेफरेंशियल बेसिसवर प्रति शेअर २३६ रुपये किमतीला ४३,७६,५०० शेअर्स जारी करण्याचा प्रस्ताव ठेवला होता. ज्या १९८ गुंतवणूकदारांना या कंपनीचे शेअर्स वाटप करण्यात आले आहेत, त्यामध्ये रोहित शर्मा आणि तिलक वर्मा यांच्यासह श्रेयस अय्यरचे वडील संतोष व्यंकटेश्वरन अय्यर आणि कोलकाता नाईट रायडर्सचे प्रशिक्षक अभिषेक मोहन नायर यांचाही समावेश आहे.

जर या प्रेफरेंशियल इश्यूला कंपनीच्या भागधारकांकडून आणि नियामक प्राधिकरणांकडून मंजुरी मिळाली, तर कंपनी या माध्यमातून सुमारे १०३.२८ कोटी रुपये उभे करू शकते. या मोठ्या रकमेचा उपयोग कंपनी आपली उत्पादन क्षमता वाढवण्यासाठी, नवीन तंत्रज्ञानामध्ये गुंतवणूक करण्यासाठी आणि बाजारात आपली पकड अधिक मजबूत करण्यासाठी करणार आहे.

टेक्सटाईल उद्योगातील ही कंपनी प्रामुख्याने डेनिम आणि कॉटन फॅब्रिक्सचे उत्पादन करते, ज्याचा वापर जीन्सपासून ते बॉटम वेअरपर्यंत केला जातो. या स्टॉकची कामगिरी पाहिली तर, २७ नोव्हेंबर रोजी यात २.५४ टक्क्यांची वाढ होऊन शेअरची किंमत २७९ रुपयांवर पोहोचली होती.

विशेष म्हणजे, गेल्या एका महिन्यात या स्टॉकमध्ये तब्बल ४४ टक्क्यांहून अधिक वाढ झाली आहे. दीर्घकाळात, या स्टॉकने गुंतवणूकदारांना गेल्या ५ वर्षांत दिलेला ९०० टक्क्यांचा नेत्रदीपक रिटर्न खेळाडूंना शेअर बाजारात का आकर्षित करत आहे, हे स्पष्ट करतो.

डिस्क्लेमर: शेअर मार्केटमध्ये गुंतवणूक करणं अत्यंत जोखमीचं आहे. कोणतीही गुंतवणूक करण्याआधी तुमच्या तज्ज्ञांचा सल्ला घ्या, कोणत्याही फायद्या तोट्यासाठी News18 मराठी जबाबदार राहणार नाही.