Weather Alert: डिसेंबरअखेर वारं फिरलं, हवामानात मोठ्या बदलांची शक्यता, IMD चा अलर्ट

उत्तरेकडून वाहणाऱ्या थंड वाऱ्यांमुळे राज्यात डिसेंबरअखेर गारठा वाढला आहे. किमान तापमानात घट होऊन सकाळ आणि रात्रीच्या वेळी थंडीचा कडाका अधिक जाणवणार आहे. विशेषतः मुंबई, ठाणे, नवी मुंबई आणि पुणे या प्रमुख शहरांमध्ये थंडीचा प्रभाव स्पष्टपणे जाणवेल. भारतीय हवामान विभागाच्या अंदाजानुसार, आज राज्यात पावसाची कोणतीही शक्यता नाही.

कोकण पट्ट्यात हवामान कोरडे आणि तुलनेने सौम्य राहणार आहे. मुंबई, ठाणे आणि नवी मुंबईत कमाल तापमान 31 ते 32 अंश सेल्सिअस दरम्यान राहण्याचा अंदाज आहे, तर किमान तापमान 18 ते 20 अंश सेल्सिअसपर्यंत घसरू शकते. सकाळच्या वेळेत काही भागांत हलकं धुके जाणवू शकतं, मात्र दिवसभर आकाश निरभ्र राहील. समुद्रकिनारी आर्द्रता जास्त असल्याने रात्री थंडावा अधिक जाणवण्याची शक्यता आहे.

आज पुणे शहर आणि परिसरात थंडीचा जोर कायम राहणार आहे. किमान तापमान 10 ते 12 अंश सेल्सिअसपर्यंत खाली येण्याची शक्यता असून कमाल तापमान 28 ते 30 अंश सेल्सिअस राहील. सकाळच्या वेळी धुक्याची शक्यता असून दुपारनंतर आकाश निरभ्र राहणार आहे. थंड वाऱ्यांमुळे सकाळी आणि रात्री बोचरी थंडी जाणवेल.

राज्याच्या अंतर्गत भागांमध्ये थंडीचा प्रभाव अधिक तीव्र होताना दिसत आहे. पश्चिम महाराष्ट्र, उत्तर महाराष्ट्र, मराठवाडा आणि विदर्भ या चारही विभागांत किमान तापमानात लक्षणीय घट नोंदवली जात आहे. काही ठिकाणी पारा 10 अंशांच्या खाली गेला असून पुढील काही दिवस गारठा कायम राहण्याची शक्यता आहे.

एकंदरीत, राज्याच्या अंतर्गत भागांमध्ये पुढील काही दिवस थंडीचा प्रभाव कायम राहणार आहे. पावसाची कोणतीही शक्यता नसून हवामान कोरडे राहील. रात्री आणि पहाटे गारठा अधिक जाणवेल, तर दुपारनंतर आकाश निरभ्र राहण्याचा अंदाज आहे. गारठा वाढल्याने नागरिकांना आरोग्याची काळजी घ्यावी लागेल.