Weather Alret : महाराष्ट्रात धडकणार बर्फासारखी कोल्ड लाट, हवामान खात्याकडून 6 जिल्ह्यांना अलर्ट

यावर्षी हिवाळ्यात म्हणजेच डिसेंबर ते फेब्रुवारी दरम्यान महाराष्ट्रातील कमाल आणि किमान तापमानाचा पारा चांगलाच घसरणार असल्याची माहिती हवामान विभागानं दिली आहे. राज्यातील तापमानाचा पारा सरासरी किंवा सरासरीच्या खाली राहण्याची शक्यता आहे. तर मराठवाडा आणि विदर्भात पुढील काही दिवसांत थंडीच्या लाटा वाढण्याची शक्यता आहे. 3 डिसेंबर रोजीही राज्यातील 6 जिल्ह्यांत शीत लहरींचा इशारा देण्यात आला आहे. त्यामुळे नागरिकांनी आवश्यक ती काळजी घेणे गरजेचे आहे. पाहुयात, 3 डिसेंबर रोजी राज्यातील तापमान आणि हवामानाची स्थिती कशी राहील.

राज्यातील इतर जिल्ह्यांत तापमानात घट झाली असता मुंबईतील तापमानात फारशी घट दिसून येत नाही. मुंबईत 3 डिसेंबर रोजी कमाल तापमान 33 अंश सेल्सिअस तर किमान तापमान 16 अंश सेल्सिअस इतकं असू शकतं. मुंबईत निरभ्र आकाश राहून वातावरण कोरडे असणार आहे. इतर ठिकाणी देखील काहीशी अशीच स्थिती राहण्याची शक्यता आहे.

पश्चिम महाराष्ट्रात गारठा चांगलाच वाढलेला दिसून येत आहे. पुणे आणि घाटमाथा परिसरात शीत लहरींचा इशारा देण्यात आला आहे. तसेच यलो अलर्टही जारी करण्यात आला आहे. तेथील कमाल तापमान 28 अंश सेल्सिअस तर किमान तापमान 10 अंश सेल्सिअस इतकं असू शकतं. कोल्हापूरमधील किमान तापमान 16 अंश सेल्सिअस इतकं असू शकतं.

मराठवाड्यातील छत्रपती संभाजीनगरमध्ये निरभ्र आकाश राहून वातावरण कोरडे राहण्याची शक्यता आहे. तेथील कमाल तापमान 28 अंश सेल्सिअस तर किमान तापमान 10 अंश सेल्सिअस इतकं असू शकतं. मराठवाड्यातील इतर शहरांतही तापमानात घट बघायला मिळत आहे. त्यामुळे गारठा वाढलाय.

नाशिकमधील तापमानात सर्वाधिक घट बघायला मिळत आहे. तेथील कमाल तापमान 29 अंश सेल्सिअस तर किमान तापमान 9 अंश सेल्सिअस इतकं असू शकतं. उत्तर महाराष्ट्रातील नाशिकसह धुळे, नंदुरबार, जळगाव, नाशिक घाटमाथा आणि अहिल्यानगर शहरात शीत लहरींचा इशारा देण्यात आला आहे. यासर्व ठिकाणी यलो अलर्ट जारी करण्यात आला आहे. उत्तर महाराष्ट्रात थंडीचा कडाका वाढल्याने नागरिकांनी आरोग्याची काळजी घेणे गरजेचे आहे.

विदर्भातही गारठा वाढलाय. तसेच ढगाळ वातावरण देखील कायम आहे. नागपूरमधील कमाल तापमान 29 अंश सेल्सिअस तर किमान तापमान 13 अंश सेल्सिअस इतकं असू शकतं. नागपुरात धुक्यासह अंशतः ढगाळ आकाश राहण्याची शक्यता आहे. विदर्भातील इतर जिल्ह्यांतही तापमानात घट बघायला मिळत आहे.

एकूणच राज्यातील तापमानात घट बघायला मिळत आहे. काही जिल्ह्यांत शीत लहरींचा इशारा देखील देण्यात आला आहे. त्यामुळे आता आरोग्याच्या समस्या उद्भवण्याची शक्यता आहे. नागरिकांनी योग्य ती काळजी घेणे गरजेचे आहे.