Holi Dahan 2026: आज होळी पौर्णिमा! होळीची पूजा, दहनाचा शुभ मुहूर्त, मंत्र, विधी, धार्मिक महत्त्व पाहा

मुंबई : आज 2 मार्च, सोमवार रोजी होळी पेटवण्याचा सण आहे. दरवर्षी फाल्गुन महिन्याच्या पौर्णिमेला होळी म्हणजे कोकणी भाषेत शिमगा उत्साहात साजरा करतो. होळी दिवशी बोंब मारायला मिळणार म्हणून लहान मुलांमध्ये वेगळाच उत्साह असतो. या दिवशी घरातील स्त्रिया शुभ वेळी होळीची पूजा करून पुरण-पोळीचा नैवेद्य अर्पण करून घराच्या सुख-समृद्धीसाठी प्रार्थना करतात. सोमवार 2 मार्च रोजी संध्याकाळी 5 वाजून 55 मिनिटांनी फाल्गुन पौर्णिमा सुरू होत असून या दिवशी प्रदोष काळात पौर्णिमा आहे. तसेच मंगळवार 3 मार्च रोजी ग्रस्तोदित चंद्रग्रहण आहे. त्यामुळे 'धर्मसिंधू'त सांगितल्याप्रमाणे पूर्वदिवशी म्हणजेच सोमवार 2 मार्च रोजी होळी पेटवावी. सोमवार 2 मार्च रोजी सूर्यास्तानंतर प्रदोष काळात भद्राकाळातही होलिका दहन करता येते, असे ज्येष्ठ पंचागकर्ते दा.कृ सोमण यांनी सांगितले.