Weather Alert: आता वादळ येणार! स्वातंत्रदिनी राज्यात मुसळधार पाऊस, 29 जिल्ह्यांना अलर्ट

गेल्या काही दिवसांपासून राज्यातील विविध भागांत पावसाची शक्यता हवामान विभागाकडून वर्तवण्यात येत आहे. काही भागांत मुसळधार पाऊस झालाय तर काही भागांत हलक्या श्रावण सरी बरसत असल्याचं दिसून येत आहे. 15 ऑगस्ट रोजीही राज्यातील विविध भागांत मुसळधार पावसाची शक्यता हवामान विभागानं वर्तवली आहे.

कोकण, मध्य महाराष्ट्र, मराठवाडा आणि विदर्भातील 29 जिल्ह्यांना पावसाचा यलो अलर्ट जारी करण्यात आला आहे. पुढील काही दिवस राज्यात पावसाची शक्यता कायम असल्याचं हवामान विभागाचा अंदाजावरून लक्षात येत आहे. पाहुयात 15 ऑगस्ट रोजी राज्यातील हवामानाची स्थिती कशी राहील.

मुंबईत मध्यम पावसाची शक्यता आहे. तर पालघर, ठाणे, रायगड, रत्नागिरी, सिंधुदुर्ग या जिल्ह्यांत मुसळधार पावसाची शक्यता हवामान विभागानं वर्तवली आहे. या जिल्ह्यांना पावसाचा यलो अलर्ट जारी करण्यात आला आहे.

पश्चिम महाराष्ट्रातील घाटमाथा परिसरात मुसळधार पावसाची शक्यता आहे. तर, पुणे, कोल्हापूर, सातारा, सांगली, सोलापूर या सर्व जिल्ह्यांत ढगांच्या गडगडाटासह हलक्या ते मध्यम स्वरूपाच्या पावसाची शक्यता वर्तवण्यात आली आहे. पुणे घाटमाथा, कोल्हापूर घाटमाथा, सातारा घाटमाथा याठिकाणी मुसळधार पावसाची शक्यता आहे. या तीन ठिकाणी पावसाचा यलो अलर्ट जारी करण्यात आला आहे.

मराठवाड्यातील छत्रपती संभाजीनगर, जालना, परभणी, बीड, हिंगोली, नांदेड या सर्व जिल्ह्यांत विजांच्या कडकडाटासह आणि वादळी वाऱ्यासह पावसाची शक्यता हवामान विभागानं वर्तवली आहे. या जिल्ह्यांना पावसाचा यलो अलर्ट जारी करण्यात आला आहे. तर लातूर आणि धाराशिव या दोन जिल्ह्यांत हलक्या ते मध्यम स्वरूपाच्या पावसाची शक्यता आहे.

उत्तर महाराष्ट्रातील नाशिक, धुळे, नंदुरबार, जळगाव, अहिल्यानगर जिल्ह्यांत विजांच्या कडकडाटासह आणि वादळी वाऱ्यासह पावसाची शक्यता वर्तवण्यात आली आहे. या सर्व जिल्ह्यांना पावसाचा यलो अलर्ट जारी करण्यात आला आहे. तर नाशिक घाटमाथा परिसरात मुसळधार पावसाची शक्यता असल्याने याठिकाणी सुद्धा यलो अलर्ट जारी करण्यात आला आहे.

विदर्भातील नागपूर, अकोला, अमरावती, चंद्रपूर, गडचिरोली या जिल्ह्यांत मुसळधार पावसाची शक्यता वर्तवण्यात आली आहे. तसेच भंडारा, गोंदिया, वर्धा, यवतमाळ याठिकाणी वादळी वाऱ्यासह आणि विजांच्या कडकडाटासह पावसाची शक्यता आहे. या 9 जिल्ह्यांना पावसाचा यलो अलर्ट जारी करण्यात आला आहे. तर बुलढाणा आणि वाशिम या दोन जिल्ह्यांत कुठलीही पावसाची शक्यता नाही. याठिकाणी स्वच्छ सूर्यप्रकाश बघायला मिळणार आहे. राज्यातील विविध भागांत मुसळधार पावसाची शक्यता वर्तवण्यात आली आहे. 29 जिल्ह्यांना पावसाचा यलो अलर्ट जारी करण्यात आला आहे. वादळी वारे आणि विजांच्या कडकडाट होण्याची देखील शक्यता असल्याने नागरिकांनी काळजी घेणे आवश्यक आहे.