Weather Alert: महाराष्ट्रात आता पुन्हा मुसळधार पाऊस करणार कमबॅक, 9 जिल्ह्यांना अलर्ट

राज्यात 7 सप्टेंबर रोजी काही भागांमध्ये मुसळधार ते अति मुसळधार पावसाची शक्यता हवामान विभागाने वर्तवली आहे. विशेषतः कोकण, उत्तर महाराष्ट्र आणि पश्चिम महाराष्ट्रातील घाटमाथ्यांवर पावसाचा जोर अधिक राहण्याचा अंदाज आहे. काही जिल्ह्यांना ऑरेंज तर काहींना यलो अलर्ट जारी करण्यात आला आहे. पाहुयात 7 सप्टेंबर रोजी राज्यातील हवामान कसे राहील.

पालघर जिल्ह्यात मुसळधार ते अति मुसळधार पावसाची शक्यता असून येथे ऑरेंज अलर्ट जारी करण्यात आला आहे. मुंबई, ठाणे आणि रायगड जिल्ह्यांत मुसळधार पावसाची शक्यता असल्याने यलो अलर्ट देण्यात आला आहे. तर रत्नागिरी आणि सिंधुदुर्ग जिल्ह्यांमध्ये मध्यम स्वरूपाचा पाऊस होण्याची शक्यता आहे.

पुणे, कोल्हापूर, सातारा, सांगली आणि सोलापूर जिल्ह्यांत हलक्या पावसाची शक्यता आहे. मात्र, पुणे घाटमाथ्यावर मुसळधार पाऊस पडण्याची शक्यता असल्याने तिथे यलो अलर्ट देण्यात आला आहे. कोल्हापूर आणि साताऱ्याच्या घाटमाथ्यावर मध्यम पावसाची शक्यता वर्तवण्यात आली आहे.

छत्रपती संभाजीनगर आणि जालना जिल्ह्यांत वादळी वाऱ्यासह आणि विजांच्या कडकडाटासह पावसाची शक्यता असून यलो अलर्ट देण्यात आला आहे. परभणी, बीड, हिंगोली, नांदेड, लातूर आणि धाराशिव जिल्ह्यांत हलक्या ते मध्यम पावसाची शक्यता आहे.

धुळे, जळगाव, नाशिक आणि अहिल्यानगर जिल्ह्यांत हलक्या ते मध्यम स्वरूपाचा पाऊस होण्याची शक्यता वर्तवण्यात आली आहे. नंदुरबार जिल्ह्यात मुसळधार पावसाचा इशारा देण्यात आला आहे. त्यामुळे यलो अलर्ट जारी करण्यात आला आहे. तसेच नाशिक घाटमाथ्यावर मुसळधार ते अति मुसळधार पावसाची शक्यता असून ऑरेंज अलर्ट जारी करण्यात आला आहे.

अकोला, अमरावती, भंडारा, बुलढाणा, गोंदिया, नागपूर, वर्धा, वाशिम आणि यवतमाळ जिल्ह्यांत अंशतः ढगाळ वातावरणासह हलक्या पावसाची शक्यता आहे. तर चंद्रपूर आणि गडचिरोली जिल्ह्यांत वादळी वाऱ्यासह विजांच्या कडकडाटासह पावसाची शक्यता असल्याने या दोन जिल्ह्यांना यलो अलर्ट देण्यात आला आहे.

7 सप्टेंबर रोजी राज्यातील काही भागांत मुसळधार पावसाची शक्यता वर्तवण्यात आली आहे. हवामान विभागाच्या अलर्टनुसार संबंधित भागातील नागरिकांनी आवश्यक ती खबरदारी घेणे गरजेचे आहे. ‎