Weather Alert: शुक्रवारी राज्यात पुन्हा मुसळधार पाऊस कोसळणार, 15 जिल्ह्यांना अलर्ट

राज्यात 5 सप्टेंबर रोजी काही भागांमध्ये मुसळधार ते अति मुसळधार पावसाची शक्यता हवामान विभागाने वर्तवली आहे. विशेषतः कोकण आणि पश्चिम महाराष्ट्रातील घाटमाथ्यांवर पावसाचा जोर अधिक राहण्याची शक्यता आहे. काही जिल्ह्यांना ऑरेंज आणि यलो अलर्ट जारी करण्यात आला आहे. पाहुयात, 5 सप्टेंबर रोजी राज्यातील हवामानाची स्थिती कशी राहील.

कोकण विभागातील पालघर, ठाणे आणि रायगड जिल्ह्यांमध्ये मुसळधार ते अति मुसळधार पावसाची शक्यता असल्याने ऑरेंज अलर्ट जारी करण्यात आला आहे. मुंबई, रत्नागिरी आणि सिंधुदुर्ग जिल्ह्यांसाठी यलो अलर्ट देण्यात आला असून, या भागांमध्ये मुसळधार पाऊस होण्याची शक्यता आहे.

पश्चिम महाराष्ट्रातील पुणे, कोल्हापूर, सातारा, सांगली आणि सोलापूर या जिल्ह्यांमध्ये हलक्या ते मध्यम स्वरूपाच्या पावसाची शक्यता आहे. मात्र पुणे घाटमाथ्यावर मुसळधार ते अति मुसळधार पावसाचा अंदाज असून तिथे ऑरेंज अलर्ट देण्यात आला आहे. तसेच, कोल्हापूर आणि साताऱ्याच्या घाटमाथ्यावर यलो अलर्ट जारी आहे.

मराठवाड्यातील छत्रपती संभाजीनगर आणि जालना येथे विजांच्या कडकडाटासह वादळी वाऱ्यांसह पावसाची शक्यता असून त्याठिकाणी यलो अलर्ट दिला आहे. परभणी, बीड, हिंगोली, नांदेड, लातूर आणि धाराशिव जिल्ह्यांमध्ये मात्र हलक्या ते मध्यम स्वरूपाचा पाऊस असण्याची शक्यता आहे.

उत्तर महाराष्ट्रातील धुळे, जळगाव आणि नाशिक जिल्ह्यांत विजांच्या कडकडाटासह मुसळधार पावसाचा अंदाज वर्तवण्यात आला असून तिथे यलो अलर्ट लागू करण्यात आला आहे. तर नंदुरबार आणि नाशिकच्या घाटमाथ्यावर अति मुसळधार पावसाची शक्यता असून तिथे ऑरेंज अलर्ट देण्यात आला आहे.

विदर्भात मात्र कोणत्याही प्रकारच्या पावसाची शक्यता नाही. अकोला, अमरावती, भंडारा, चंद्रपूर, नागपूर, गडचिरोली, गोंदिया, बुलढाणा, वर्धा, वाशिम आणि यवतमाळ या जिल्ह्यांमध्ये अंशतः ढगाळ वातावरण राहण्याची शक्यता आहे.

5 सप्टेंबर रोजी राज्यातील काही भागांत मुसळधार पावसाची शक्यता वर्तवण्यात आली आहे. हवामान विभागाच्या अलर्टनुसार, संबंधित भागातील नागरिकांनी आवश्यक ती खबरदारी घेणे गरजेचे आहे. विशेषतः घाटमाथ्यांमधील दरडी कोसळण्याचा धोका लक्षात घेता प्रवास टाळावा, असे आवाहन प्रशासनाकडून करण्यात आले आहे.