पैशांच्या तंगीपासून हवीय सुटका? होळीपूर्वीच बाहेर काढा 'या' वस्तू, वास्तूदोष होईल झटपट दूर!

हिंदू धर्मात होळीचा सण म्हणजे केवळ रंगांची उधळण नसून, जीवनातील नकारात्मकता जाळून सकारात्मकतेचे स्वागत करण्याचा काळ आहे. ज्योतिष आणि वास्तुशास्त्रानुसार, होळीच्या आधी आपल्या घरातून काही विशिष्ट अशुभ वस्तू बाहेर काढणे अत्यंत आवश्यक मानले जाते. जर तुमच्या घरात सतत पैशांची चणचण भासत असेल किंवा विनाकारण खर्च होत असतील, तर त्याचे कारण तुमच्या घरात दडलेल्या काही वास्तू असू शकतात.

वास्तुशास्त्र सांगते की, ज्याप्रमाणे आपण होलिका दहनात वाईट प्रवृत्तींचे दहन करतो, त्याचप्रमाणे घरातील 'कचरा' आणि 'अडगळ' देखील आपल्या प्रगतीला खिळ घालते.

फाल्गुन महिन्यात वातावरणात होणाऱ्या बदलांसोबत घराची ऊर्जा शुद्ध करणे आवश्यक असते. जर घरात नकारात्मक ऊर्जा आकर्षित करणाऱ्या वस्तू असतील, तर देवी लक्ष्मीचा आशीर्वाद मिळण्यास अडथळे येतात. म्हणूनच होळीच्या शुभ मुहूर्तापूर्वी घराचे शुद्धीकरण करणे आर्थिक सुबत्तेसाठी महत्त्वाचे आहे.

तुटलेल्या किंवा खंडित मूर्ती: अनेकदा आपण देवघरातील मूर्ती किंवा चित्रांना तडा गेल्यास ती तशीच ठेवतो. खंडित मूर्ती नकारात्मक ऊर्जा पसरवतात, ज्यामुळे घरातील सुख-शांती भंग होते. होळीपूर्वी अशा मूर्ती सन्मानाने वाहत्या पाण्यात विसर्जित कराव्यात किंवा पिंपळाच्या झाडाखाली ठेवाव्यात.

बंद पडलेली घड्याळे: घड्याळ हे काळाचे आणि आपल्या प्रगतीचे प्रतीक आहे. बंद पडलेले घड्याळ जीवनातील 'वेळ' थांबल्याचे संकेत देते. यामुळे नोकरी किंवा व्यवसायात प्रगती खुंटते. अशी घड्याळे दुरुस्त करून घ्या किंवा तातडीने घराबाहेर काढा.

फाटलेल्या जुन्या चपला: घराच्या मुख्य दरवाजाजवळ किंवा अडगळीत पडलेल्या जुन्या, फाटलेल्या चपला दारिद्र्याला निमंत्रण देतात. वास्तूनुसार यामुळे 'शनी'चा कोप होऊ शकतो आणि कामात अडथळे येतात. होळीच्या स्वच्छतेत अशा वस्तू कचऱ्यात टाकाव्यात.

तुटलेले आरसे आणि काचेच्या वस्तू: काचेच्या तुटलेल्या वस्तूंमध्ये नकारात्मक ऊर्जा साठलेली असते. तुटलेला आरसा मानसिक तणाव आणि कुटुंबातील भांडणांचे कारण बनतो. खिडकीची फुटलेली काच किंवा तडा गेलेली भांडी होळीपूर्वी काढून टाकणे शुभ मानले जाते. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)